ରାଉରକେଲା: ରାଉରକେଲାର ବାଲୁଘାଟ ନିକଟରୁ ବେଆଇନ ଭାବେ ବିସ୍ଫୋରକ ସାମଗ୍ରୀ ଚାଲାଣ କରୁଥିବା ଏକ ଗାଡ଼ିକୁ ପୋଲିସ ଜବତ କରିଛି। ଗାଡ଼ି ଭିତରୁ ୧୧୬ ପେଟି ବିସ୍ଫୋରକ ସାମଗ୍ରୀ ଉଦ୍ଧାର ହୋଇଛି, ଯେଉଁଥିରେ ମୋଟ ୨୩,୨୦୦ଟି ବିସ୍ଫୋରକ ପ୍ୟାକେଟ୍ ଥିବା କଥା ପୋଲିସ କହିଛି।
ଏହି ଜବତ ବେଳେ କୌଣସି ବୈଧ କାଗଜପତ୍ର ଉପସ୍ଥାପନ କରାଯାଇନଥିବାରୁ, ବିସ୍ଫୋରକ ସାମଗ୍ରୀ ଦ୍ୱାରା କୌଣସି ଅବୈଧ କାମ କରାଯାଉଥିଲା ବୋଲି ଅନୁମାନ କରାଯାଉଛି।
ଘଟଣା ସମ୍ୱନ୍ଧରେ ରଘୁନାଥପାଲି ଥାନା ପୋଲିସ ତଦନ୍ତ ଆରମ୍ଭ କରିଛି। ଏସଆଇଟି ଟିମ୍ ବି ଘଟଣାସ୍ଥଳକୁ ପହଞ୍ଚି ତଦନ୍ତ କାର୍ଯ୍ୟ ଜାରି ରଖିଛି। ଏପରି ଅବସ୍ଥାରେ ବିସ୍ଫୋରକ ଗୋଦାମ ମାଲିକ ଶ୍ରବଣ ଅଗ୍ରୱାଲ ଓ ଗାଡ଼ି ଚାଳକଙ୍କୁ ପୋଲିସ ଅଟକ ରଖି ପଚରାଉଚରା କରୁଛି।
ଏହି ବିସ୍ଫୋରକ ସାମଗ୍ରୀ କେଉଁଠିକୁ ଯାଉଥିଲା ଓ କିଏ ଏହା ପଛରେ ଅଛି, ତାହା ନେଇ ଛାନବିନ ଜାରି ରହିଛି।
ରିପୋର୍ଟ: ଶୁଭସ୍ମିତା ପ୍ରଧାନ