ଭୁବନେଶ୍ୱର : ଉତ୍କଳ ବିଶ୍ୱବିଦ୍ୟାଳୟ ସ୍ନାତକୋତ୍ତର ଜାତୀୟ ସେବା ଯୋଜନା (ଏନଏସଏସ) ଆନୁକୂଲ୍ୟରେ ଆୟୋଜିତ ସାତଦିନିଆ ସ୍ୱତନ୍ତ୍ର ଶିବିର ସୋମବାର ସଫଳତାର ସହ ସମାପ୍ତ ହୋଇଛି।ଉଦଯାପନୀ ଦିବସରେ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଯଜ୍ଞେଶ୍ୱର ଦଣ୍ଡପାଟ ମୁଖ୍ୟ ଅତିଥି ଭାବେ ଯୋଗଦେଇ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରିବା ସହ ଛାତ୍ରଛାତ୍ରୀଙ୍କୁ ସମାଜ ସେବା ପାଇଁ ଶପଥ ପାଠ କରାଇଥିଲେ। ପରିଶେଷରେ କୁଳପତି ଏନଏସଏସ ପତାକା ଅବତରଣ କରିବା ସହ ଶିବିରର ସମାପ୍ତି ଘୋଷଣା କରିଥିଲେ।
ଗତ ୧୩ ତାରିଖରୁ ଆରମ୍ଭ ହୋଇଥିବା ଏହି ଶିବିରକୁ ରାଜ୍ୟ ନୋଡାଲ ଅଫିସର ଡଃ ରମେଶ ଚନ୍ଦ୍ର ବେହେରା ମୁଖ୍ୟ ଅତିଥି ଏବଂ ବିଶ୍ୱବିଦ୍ୟାଳୟ ଏନଏସଏସ ସଂଯୋଜକ ପ୍ରଫେସର ବ୍ରଜ ନାରାୟଣ ପାତ୍ର ମୁଖ୍ୟ ବକ୍ତା ଭାବେ ଯୋଗଦେଇ ପତାକା ଉତ୍ତୋଳନ ପୂର୍ବକ ଉଦ୍ଘାଟନ କରିଥିଲେ।
ପ୍ରାରମ୍ଭିକ ଅଧିବେଶନରେ ସ୍ନାତକୋତ୍ତର ଏନଏସଏସ (ପୁରୁଷ) ପ୍ରୋଗ୍ରାମ ଅଫିସର ଡ. ଶାନ୍ତି ସ୍ୱରୂପ ସାହୁ ସ୍ୱାଗତ ଭାଷଣ ଦେବା ସହ ଶିବିରର ଆଭିମୁଖ୍ୟ ସମ୍ପର୍କରେ ଆଲୋକପାତ କରିଥିଲେ। ଅତିଥିମାନେ ସେମାନଙ୍କ ଅଭିଭାଷଣରେ ସମାଜ ଗଠନରେ ସ୍ୱେଚ୍ଛାସେବୀଙ୍କ ଭୂମିକା ଓ ବ୍ୟକ୍ତିତ୍ୱ ବିକାଶ ଉପରେ ଗୁରୁତ୍ୱାରୋପ କରିଥିଲେ। ଏନଏସଏସ (ମହିଳା) ପ୍ରୋଗ୍ରାମ ଅଫିସର ଡ. କବିତା ଦାସ ଉଦ୍ଘାଟନୀ ଉତ୍ସବରେ ଧନ୍ୟବାଦ ଅର୍ପଣ କରିଥିଲେ।
ଏହି ସାତ ଦିନ ମଧ୍ୟରେ ୧୦୦ ଜଣ ସ୍ୱେଚ୍ଛାସେବୀ ବିଶ୍ୱବିଦ୍ୟାଳୟ ପରିସରସ୍ଥ ଜଗନ୍ନାଥ ମନ୍ଦିର, ତାଳପଦେଶ୍ୱରୀ ମନ୍ଦିର, ଗାନ୍ଧୀ ପାର୍କ ଓ ରକ୍ ଗାର୍ଡେନରେ ସଫେଇ ଅଭିଯାନ ଚଳାଇବା ସହ ପୁରାତନ ଭାରତୀୟ ଇତିହାସ ବିଭାଗରେ ବୃକ୍ଷରୋପଣ କରିଥିଲେ। ଏଥିସହ ସ୍ୱେଚ୍ଛାସେବୀଙ୍କ ମଧ୍ୟରେ ନୃତ୍ୟ, ସଙ୍ଗୀତ, ରଙ୍ଗୋଲି, ବକ୍ତୃତା ଓ ସାଧାରଣ ଜ୍ଞାନ ଭଳି ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଡ. ସାହୁ ଓ ଡ. ଦାସଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମଗ୍ର କାର୍ଯ୍ୟକ୍ରମଟି ସୂଚାରୁରୂପେ ପରିଚାଳିତ ହୋଇଥିଲା।