ପାଇକଙ୍କ ବୀରତ୍ବ ଗାଥା ବଖାଣୁଛି କାଞ୍ଜିଆଗଡର ଶିଳାଖଣ୍ଡ – ଲଢେଇର ପ୍ରମାଣ

ଖୋର୍ଦ୍ଧା: ବ୍ରିଟିଶ ବିରୋଧରେ ପାଇକ ସଂଗ୍ରାମର ଆଉ ଏକ କୀର୍ତ୍ତିରାଜି କାଞ୍ଜିଆଗଡ଼ରେ ଦେଖିବାକୁ ମିଳିଛି । ବଡ଼ବଡ଼ ଶିଳାଖଣ୍ଡ ପାଇକଙ୍କ ବୀରତ୍ୱର ଗାଥା ବହନ କରୁଥିବା କୁହାଯାଇଛି । ଏଠାରେ ଦେଖିବାକୁ ମିଳିଥିବା ଶିଳାଖଣ୍ଡର ରକ୍ଷଣାବେକ୍ଷଣ ସହ ଖନନ କରାଯାଇ ଗବେଷଣା ପାଇଁ ଉଠିଛି ଦାବି । ପାଇକ ସଂଗ୍ରାମର ଏନ୍ତୁଡ଼ିଶାଳ ହେଉଛି ଖୋର୍ଦ୍ଧା ଗଡ଼ । ଆଉ ବରୁଣେଇର ଅନତି ଦୂରରେ ଥିବା ନନ୍ଦପୁର ପଞ୍ଚାୟତର ମହାତପଲ୍ଲା ସ୍ଥିତ କାଞ୍ଜିଆଗଡ଼ରୁ ମିଳିଛି ପାଇକଙ୍କ ଇଂରେଜ ବିରୋଧ ଲଢେଇ ପ୍ରମାଣର ଶିଳାଲିପି ।

ଖୋର୍ଦ୍ଧା ଗଡ଼କୁ ଦଖଲ କରିବା ପାଇଁ ଇଂରେଜ ସୈନ୍ୟ ଖୋର୍ଦ୍ଧାର ଚାରିପଟୁ ଅଭିଯାନ ଆରମ୍ଭ କରିଥିଲେ ବୋଲି କୁହାଯାଏ । ଲୋକକଥା ଅନୁସାରେ, ଦଶହରା ସମୟରେ ଶସ୍ତ୍ରପୂଜା କରି ଗଡ଼ ଜଗିଥିବା 18 ଜଣ ପାଇକ ବିଶ୍ରାମ ନେଉଥିଲେ । ସେହି ସମୟରେ ଅସ୍ତ୍ର ବିରତିର ପରମ୍ପରା ଥିବାରୁ ଏହାର ସୁଯୋଗ ନେଇ ସେହି ୧୮ ଜଣ ପାଇକଙ୍କୁ ନିର୍ମମ ହତ୍ୟା କରିଥିଲେ ଇଂରେଜ ସୈନ୍ୟ । ଏହି 18 ଜଣ ପାଇକ ସମସ୍ତେ ଗୋଟିଏ ପରିବାରର ଓ ସମ୍ପର୍କରେ ଭାଇ ବୋଲି କୁହାଯାଏ । ଏହି ପାଇକମାନେ ଯିଏ ଯେଉଁ ବିଦ୍ୟାରେ ପାରଙ୍ଗମ ଥିଲେ ସେହି ଅନୁସାରେ ଯୁଦ୍ଧାସ୍ତ୍ର ଧରିଥିବାର ଛବି ପଥର ମାଧ୍ୟମରେ ଖୋଦେଇ କରି କାଳଜୟୀ ପାଇଁ ରଖାଯାଇଛି । ଏହାର ସଠିକ ରକ୍ଷଣାବେକ୍ଷଣ ସହ ଗବେଷଣା କରାଯିବାକୁ ଦାବି କରିଛନ୍ତି ପାଇକ ଗଡ଼ ବିକାଶ ମଞ୍ଚର ସଭାପତି।

ପାଇକ ଦାୟାଦ କହିଛନ୍ତି ଯେ ଖୋର୍ଦ୍ଧା ଏବଂ ଏହାର ଆଖ ପାଖ ଅଞ୍ଚଳର ବିଭିନ୍ନ ସମୟରେ ଉଦ୍ଧାର ହୋଇଛି ପାଇକଙ୍କ ଅନେକ କୀର୍ତ୍ତିରାଜି । ଇଂରେଜ ବିରୋଧରେ ଲଢେଇର ଅନେକ ବଳିଷ୍ଠ ପ୍ରମାଣ ରହିଛି । ଉଦ୍ଧାର ହୋଇଥିବା ଏଭଳି ଅନେକ କୀର୍ତ୍ତିରାଜିକୁ ଖୋର୍ଦ୍ଧାଠାରେ ସଂରକ୍ଷିତ କରି ରଖାଯିବା ସହ ଏକ ପାଇକ ଏକାଡେମୀ ଓ ଗବେଷଣା କେନ୍ଦ୍ର ପ୍ରତିଷ୍ଠା କରିବାକୁ ଯାଉଛନ୍ତି କେନ୍ଦ୍ର ସରକାର । ସେହିଠାରେ ରଖି ଗବେଷଣା କଲେ ଅନେକ ତଥ୍ୟ ମିଳିପାରିବ ବୋଲି ଆଶା କରାଯାଉଛି । ସେହିପରି କାଞ୍ଜିଆ ଗଡ଼ର ଏହି ଖୋଦିତ ଶିଳାଖଣ୍ଡକୁ ସଂରକ୍ଷିତ କରି ରଖିବା ସହ ଏହାକୁ ଖନନ କରାଗଲେ ପାଇକ ବିଦ୍ରୋହ ସମ୍ପର୍କିତ ଅନେକ ତଥ୍ୟ ମିଳିପାରିବ ବୋଲି କୁହାଯାଉଛି ।