ରାଜନୀତି ବିଜ୍ଞାନର ମୁଖ୍ୟ ବିନ୍ଧାଣୀ ପ୍ରଫେସର ଶ୍ରୀରାମ ଚନ୍ଦ୍ର ଦାଶଙ୍କ ଓଡ଼ିଶାରେ ଉଚ୍ଚଶିକ୍ଷା ଓ ରାଜନୀତି ବିଜ୍ଞାନ କ୍ଷେତ୍ରରେ ଅବଦାନ ଅତୁଳନୀୟ

ଭୁବନେଶ୍ବର : ରାଜନୀତି ବିଜ୍ଞାନର ମୁଖ୍ୟ ବିନ୍ଧାଣୀ ପ୍ରଫେସର ଶ୍ରୀରାମ ଚନ୍ଦ୍ର ଦାଶଙ୍କ ଓଡ଼ିଶାରେ ଉଚ୍ଚଶିକ୍ଷା ଓ ରାଜନୀତି ବିଜ୍ଞାନ କ୍ଷେତ୍ରରେ ଅବଦାନ ଅତୁଳନୀୟ। ଶ୍ରୀରାମଚନ୍ଦ୍ର ଦାଶ ଓଡ଼ିଆଙ୍କ ମଧ୍ୟରେ ଏକ ଆଚମ୍ବିତ ବ୍ୟକ୍ତିତ୍ୱ। ତାଙ୍କ ଭଳି ଜଣେ ପଣ୍ଡିତ, ଛାତ୍ରବତ୍ସଳ ଶିକ୍ଷକ, ଦକ୍ଷ ଅଧ୍ୟାପକ, ତଥା ସାହସୀ ମଣିଷ ସମାଜରେ ବିରଳ। ସେ ଥିଲେ ଜଣେ ଯୁଗଜନ୍ମା। କୁହାଯାଏ ତାଙ୍କର ଭାଷଣରେ ଏତେ ମାଦକତା ଥିଲା ଯେ ଯିଏ ତାଙ୍କୁ ଶୁଣୁଥିଲେ ଅବାକ ହୋଇ ରହିଯାଉଥିଲେ ବୋଲି ପ୍ରଫେସର ଶ୍ରୀରାମ ଚନ୍ଦ୍ର ଦାଶଙ୍କ ୧୦୭ତମ ଜନ୍ମବାର୍ଷିକୀ ପାଳନ ଅବସରରେ ବକ୍ତାମାନେ କହିଛନ୍ତି।

ଉତ୍କଳ ବିଶ୍ୱବିଦ୍ୟାଳୟର ରାଜନୀତି ବିଜ୍ଞାନ ବିଭାଗର ପ୍ରଥମ ମୁଖ୍ୟ ପ୍ରଫେସର ଶ୍ରୀରାମ ଚନ୍ଦ୍ର ଦାଶଙ୍କ ୧୦୭ତମ ଜନ୍ମବାର୍ଷିକୀ ପାଳିତ ହୋଇଯାଇଛି। ରାଜନୀତି ବିଭାଗ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଅବସରପ୍ରାପ୍ତ ବରିଷ୍ଠ ପ୍ରଶାସକ ତଥା ଓଡ଼ିଶା ଲୋକସେବା ଆୟୋଗର ପୂର୍ବତନ ଅଧ୍ୟକ୍ଷ ବିବେକ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗ ଦେଇ “ଭାରତୀୟ ଗଣତନ୍ତ୍ର ବନାମ ଆମେରିକୀୟ ଅରାଜକତା” ବିଷୟବସ୍ତୁ ଉପରେ ବକ୍ତବ୍ୟ ପ୍ରଦାନ କରିଥିଲେ । ଆହ୍ବାନ ସତ୍ତ୍ବେ ଭାରତର ଗଣତାନ୍ତ୍ରିକ ଅନୁଷ୍ଠାନଗୁଡ଼ିକ କିପରି ସ୍ଥିରତା ସହିତ କାର୍ଯ୍ୟ ଜାରି ରଖିଛନ୍ତି ତାହା ପ୍ରକାଶ କରିଥିଲେ। ଉତ୍କଳ ବିଶ୍ବବିଦ୍ୟାଳୟର ପୂର୍ବତନ ପିଜି କାଉନସିଲ ଅଧ୍ୟକ୍ଷ ପ୍ରଫେସର ବ୍ରହ୍ମାନନ୍ଦ ଶତପଥୀ ସମ୍ମାନିତ ଅତିଥି ଭାବେ ଯୋଗଦେଇ ସ୍ୱାସ୍ଥ୍ୟ ସେବା ଏବଂ ବୀମା ସବସିଡିର ସମ୍ପ୍ରସାରଣ ପ୍ରସଙ୍ଗ ଉପରେ ବକ୍ତୃତା ପ୍ରଦାନ କରିଥିଲେ ।

ରାଜନୀତି ବିଜ୍ଞାନ ବିଭାଗ ମୁଖ୍ୟ ପ୍ରଫେସର ଡ. ସୀମା ମଲ୍ଲିକଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ସହକାରୀ ପ୍ରଫେସର ଡ. ସ୍ୱପ୍ନା ଏସ ପ୍ରଭୁ, ସହକାରୀ ପ୍ରଫେସର ଡ. ନିତ୍ୟାନନ୍ଦ ବାରିକ, ଅଧ୍ୟାପକ ଉମେଶ ଚନ୍ଦ୍ର ନାୟକଙ୍କ ସମେତ ଛାତ୍ରଛାତ୍ରୀ ଓ ଗବେଷକମାନେ ଉପସ୍ଥିତ ଥିଲେ ।