ଟାଙ୍ଗୀ: ରାସ୍ତାରେ ବାଇକ ଚଳାଇ ଯାଉଥିବା ସମୟରେ ଘଟିଲା ଅଘଟଣ, ଚାଲିଗଲା ଜୀବନ । ଖୋର୍ଦ୍ଧା ଜିଲ୍ଲାର ଟାଙ୍ଗୀ ବ୍ଲକ ଅନ୍ତର୍ଗତ ଗୋବିନ୍ଦପୁର ସାହିର ବାସିନ୍ଦା ୨୪ ବର୍ଷିୟ ଉପେନ୍ଦ୍ର ବେହେରା ବୁଧବାର ଯାତ୍ରା ଦେଖିବାକୁ ଯିବା ବେଳେ ସଡକ ଦୁର୍ଘଟଣାରେ ପ୍ରାଣ ହାରାଇଛନ୍ତି। ଘଟଣା ୧୬ ନମ୍ବର ଜାତୀୟ ରାଜପଥର ଉଗ୍ରତାରା ଛକ ନିକଟରେ ଘଟିଛି।
ଖବର ଅନୁଯାୟୀ, ରାସ୍ତା କଡ଼ାରେ ଅବ୍ୟବସ୍ଥିତ ଭାବରେ ରଖାଯାଇଥିବା ଏକ ଟ୍ରକ ପଛରେ ଉପେନ୍ଦ୍ରଙ୍କ ବାଇକ ଧକ୍କା ହୋଇଥିଲା। ଘଟଣା ସ୍ଥଳରେ ହିଁ ଉପେନ୍ଦ୍ର ବେହେରାଙ୍କର ମୃତ୍ୟୁ ଘଟିଥିଲା।
ଖବର ପାଇ ଟାଙ୍ଗୀ ପୋଲିସ ଘଟଣା ସ୍ଥଳକୁ ପହଞ୍ଚି ମୃତଦେହକୁ ଉଦ୍ଧାର କରିଛି। ବାଇକ ଓ ଟ୍ରକକୁ ଜବତ ପରେ ପୋଲିସ ତଦନ୍ତ ଆରମ୍ଭ କରିଛି। ଏ ଦୁର୍ଘଟଣା ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଦେଖାଦେଇଛି।
ରିପୋର୍ଟ: ଶୁଭସ୍ମିତା ପ୍ରଧାନ