ବେଲୁଚିସ୍ତାନ: ପାକିସ୍ତାନର ବେଲୁଚିସ୍ତାନ ପ୍ରଦେଶର ଖୁଜଦାର ଅଞ୍ଚଳରେ ମଙ୍ଗଳବାର ଜଣେ ଆତ୍ମଘାତୀ ଆତଙ୍କବାଦୀ ଦ୍ୱାରା ହୋଇଥିବା ଏକ ଭୟାନକ ବିସ୍ଫୋରଣରେ ଅନ୍ତତଃ ୪ ଜଣ ଶିଶୁ ଜୀବନ ହରାଇଛନ୍ତି ଏବଂ ୩୮ ଜଣ ଆହତ ହୋଇଛନ୍ତି। ଏହି ଆତ୍ମଘାତୀ ଆକ୍ରମଣଟି ସ୍କୁଲ ବସ୍କୁ ଟାର୍ଗେଟ କରି କରାଯାଇଥିଲା, ଯେଉଁଥିରେ ବହୁ ସଂଖ୍ୟାରେ ପିଲା ଯାତ୍ରା କରୁଥିଲେ।
ସ୍ଥାନୀୟ ସୂଚନା ଅନୁଯାୟୀ, ସ୍କୁଲ ବସ୍ଟି ଖୁଜଦାର ଅଞ୍ଚଳର ଜିରୋ ପଏଣ୍ଟ ନିକଟରେ ଥିବାବେଳେ ଏହି ଆତ୍ମଘାତୀ ବିସ୍ଫୋରଣ ଘଟିଥିଲା। ଆକ୍ରମଣ ପରେ ଘଟଣାସ୍ଥଳରେ ଅସ୍ତବ୍ୟସ୍ତ ପରିସ୍ଥିତି ସୃଷ୍ଟି ହୋଇଥିଲା ଏବଂ ଆହତମାନଙ୍କୁ ତୁରନ୍ତ ନିକଟସ୍ଥ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲେ। ଗୁରୁତର ଆହତମାନଙ୍କୁ କ୍ୱେଟା ଏବଂ କରାଚୀର ହସ୍ପିଟାଲକୁ ପଠାଯାଇଛି।
ପାକିସ୍ତାନର ଗୃହମନ୍ତ୍ରୀ ମୋହସିନ୍ ନକଭି ଏହି ଆତ୍ମଘାତୀ ଆକ୍ରମଣ ପ୍ରତି ଦୃଢ଼ ନିନ୍ଦା ପ୍ରକାଶ କରିଛନ୍ତି। ସେ ଏହାକୁ ଏକ ଘୃଣାଜନକ ଷଡ଼ଯନ୍ତ୍ର ଭାବେ ବିବେଚନା କରି ଦେଶର ଏକତାକୁ ଭଙ୍ଗ କରିବା ପାଇଁ ଆତଙ୍କବାଦୀମାନେ ଏହି ପ୍ରୟାସ କରୁଛନ୍ତି ବୋଲି କହିଛନ୍ତି। ଟ୍ୱିଟର ମାଧ୍ୟମରେ ଏକ ସରକାରୀ ପୋଷ୍ଟ ମାଧ୍ୟମରେ ନକଭି ମୃତ ପିଲାମାନଙ୍କ ପରିବାର ପ୍ରତି ଗଭୀର ସମବେଦନା ଜଣାଇଛନ୍ତି ଏବଂ କହିଛନ୍ତି ଯେ, ଏହି ଆକ୍ରମଣକାରୀମାନେ ନିର୍ମମ ଭାବରେ ନିରପରାଧ ଶିଶୁମାନଙ୍କୁ ନିଜ ଶିକାର ବନାଇଛନ୍ତି।
ସ୍ଥାନୀୟ ପ୍ରଶାସନ ଏବଂ ସେନା ବଳ ଦ୍ୱାରା ଘଟଣାସ୍ଥଳକୁ ଘେରି ତଦନ୍ତ ଆରମ୍ଭ କରାଯାଇଛି। ଏଥିରେ କିଏ ଜିମ୍ମେଦାର ଏବଂ କେମିତି ଏହି ଆତ୍ମଘାତୀ ବିସ୍ଫୋରଣ ପ୍ରଚାଳିତ ହେଲା, ତାହା ନିଖୁଣ ଭାବରେ ତଦନ୍ତ କରାଯିବ ବୋଲି ସରକାର ପକ୍ଷରୁ ଜଣାଯାଇଛି।
ଏହି ନିର୍ମମ ଆକ୍ରମଣ ପାକିସ୍ତାନର ଶିକ୍ଷା ବ୍ୟବସ୍ଥା ଏବଂ ନିରପରାଧ ଶିଶୁମାନଙ୍କ ସୁରକ୍ଷାକୁ ନେଇ ଗଭୀର ଚିନ୍ତା ପ୍ରକଟ କରିଛି। ଦେଶ ଓ ବିଦେଶରୁ ମଧ୍ୟ ଏହି ଘଟଣା ପ୍ରତି ନିନ୍ଦା ବ୍ୟକ୍ତ କରାଯାଇଛି।
ରିପୋର୍ଟ: ଶୁଭସ୍ମିତା ପ୍ରଧାନ