ରମାଦେବୀ ବିଶ୍ୱବିଦ୍ୟାଳୟରେ ରାଜ୍ୟସ୍ତରୀୟ ଯୁବ ରେଡକ୍ରସ୍ ପ୍ରଶିକ୍ଷଣ ଶିବିର ଉଦଯାପିତ

ଭୁବନେଶ୍ୱର: ରମାଦେବୀ ମହିଳା ବିଶ୍ୱବିଦ୍ୟାଳୟ ପରିସରରେ ରାଜ୍ୟସ୍ତରୀୟ ଯୁବ ରେଡକ୍ରସ୍ (ୱାଇଆରସି) ସ୍ୱେଚ୍ଛାସେବକ ଅଧ୍ୟୟନ ଓ ପ୍ରଶିକ୍ଷଣ ଶିବିର ଅତ୍ୟନ୍ତ ସଫଳତାର ସହ ଉଦଯାପିତ ହୋଇଯାଇଛି। ତିନି ଦିନ ଧରି ଚାଲିଥିବା ଏହି ଶିବିରକୁ ଓଡ଼ିଶାର ମାନ୍ୟବର ରାଜ୍ୟପାଳ ତଥା ଭାରତୀୟ ରେଡକ୍ରସ୍ ସମିତି ଓଡ଼ିଶା ଶାଖାର ଅଧ୍ୟକ୍ଷ ଡ଼କ୍ଟର ହରି ବାବୁ କମ୍ଭମପାଟି ଆନୁଷ୍ଠାନିକ ଭାବେ ଶୁଭାରମ୍ଭ କରିଥିଲେ।

ଏହି କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା ଯୁବ ସ୍ୱେଚ୍ଛାସେବକମାନେ ଅଂଶଗ୍ରହଣ କରି ପ୍ରାଥମିକ ଚିକିତ୍ସା, ଏଚଆଇଭି/ଏଡସ୍ ସଚେତନତା, ମାଦକ ଦ୍ରବ୍ୟ ନିବାରଣ ଏବଂ ନୈତିକ ଶିକ୍ଷା ଭଳି ଗୁରୁତ୍ୱପୂର୍ଣ୍ଣ ବିଷୟରେ ପ୍ରଶିକ୍ଷଣ ଲାଭ କରିଥିଲେ। ବିଶେଷ କରି ସ୍ୱେଚ୍ଛାସେବାର ପ୍ରକୃତ ମୂଲ୍ୟବୋଧ ଏବଂ ସାମାଜିକ ଦାୟିତ୍ୱବୋଧ ଉପରେ ଏଠାରେ ବ୍ୟାପକ ଆଲୋଚନା କରାଯାଇଥିଲା।

ଏହି ଶିବିର କେବଳ ପ୍ରଶିକ୍ଷଣ ମଧ୍ୟରେ ସୀମିତ ନରହି, ସ୍ୱେଚ୍ଛାସେବକମାନଙ୍କ ମଧ୍ୟରେ ଥିବା ପ୍ରତିଭାର ବିକାଶ ପାଇଁ ଏକ ସୁନ୍ଦର ପ୍ଲାଟଫର୍ମ ପ୍ରଦାନ କରିଥିଲା। “ମିଟ୍ ଦ ଆଇକନ” କାର୍ଯ୍ୟକ୍ରମ ମାଧ୍ୟମରେ ଯୁବପିଢ଼ିଙ୍କୁ ପ୍ରେରଣା ଦିଆଯିବା ସହ ଗତ ୧୫ ତାରିଖରୁ ବିଭିନ୍ନ ସାହିତ୍ୟିକ ଓ ସାଂସ୍କୃତିକ ପ୍ରତିଯୋଗିତା ଆୟୋଜନ କରାଯାଇ ସେମାନଙ୍କ ଦକ୍ଷତା ପ୍ରଦର୍ଶନର ସୁଯୋଗ ଦିଆଯାଇଥିଲା।

ଉଦଯାପନୀ ସଭାରେ ବିଶ୍ୱବିଦ୍ୟାଳୟର ଭାରପ୍ରାପ୍ତ କୁଳପତି ପ୍ରଫେସର ଚଣ୍ଡିଚରଣ ରଥ ଏବଂ ୱାଇଆରସି ଓଡ଼ିଶା ଶାଖାର ସମ୍ମାନନୀୟ ସଚିବ ଗଣେଶ ଚନ୍ଦ୍ର ପଟ୍ଟନାୟକଙ୍କ ସମେତ ବହୁ ବିଶିଷ୍ଟ ଅଧିକାରୀ ଉପସ୍ଥିତ ରହି ଶିବିରାର୍ଥୀଙ୍କୁ ଉତ୍ସାହିତ କରିଥିଲେ। ଶେଷରେ ଭୁବନେଶ୍ୱର ଅଞ୍ଚଳ କନଭେନର ସଚିବା ଶ୍ରୀମତୀ ଲେଖା ଦାସ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ, ଯାହା ଶିବିରର ସଫଳ ସମାପ୍ତିକୁ ସୂଚିତ କରିଥିଲା।