ଭୁବନେଶ୍ବର: ଆଜକୁ ଦୀର୍ଘ ୧୨ ବର୍ଷ ଧରି ସତ୍ୟନଗର ଲେଡିଜ୍ ଫୋରମ୍ ସମାଜ ସେବା କାର୍ଯ୍ୟରେ ନିଜକୁ ନିୟୋଜିତ କରିଆସିଅଛି। ବିଶେଷ କରି ଶିଶୁ ଏବଂ ମହିଳାମାନଙ୍କର ସ୍ବାସ୍ଥ୍ୟ ସେବା କ୍ଷେତ୍ରରେ ନିରନ୍ତର କାର୍ଯ୍ୟ ଜାରି ରଖିଛି। ଏହିସବୁ କାର୍ଯ୍ୟ କରିବାକୁ ହେଲେ ଗୋଟେ ସ୍ଥାନରେ ବସିବାକୁ ପଡ଼ିବ। କିନ୍ତୁ ଭୁବନେଶ୍ବର ସତ୍ୟନଗର ଲେଡିଜ୍ ଫୋରମର ସଦସ୍ୟାମାନଙ୍କ ବସିବା ପାଇଁ ପ୍ରକୃତ ସ୍ଥାନ ନାହିଁ। ସେମାନଙ୍କୁ ବସିବା ପାଇଁ ସ୍ଥାନ ଦିଆଯାଉ ଏବଂ ନ୍ୟାୟ ପ୍ରଦାନ ପାଇଁ ପଦକ୍ଷେପ ନିଆଯାଉ ବୋଲି ସେମାନେ ଦାବି କରିଛନ୍ତି।
ସତ୍ୟନଗର ଲେଡିଜ୍ ଫୋରମର ସଦସ୍ୟାମାନେ ବସିବା ପାଇଁ ସତ୍ୟନଗରରେ ଅବସ୍ଥିତ ଏକ ପାର୍କ ମଧ୍ୟରେ ଏକ ପ୍ରକୋଷ୍ଠରେ ବସିବାକୁ ସ୍ଥାନ ଥିବା ସତ୍ବେ କିଛି ବ୍ୟକ୍ତି ବିଶେଷ ସେହି ପ୍ରକୋଷ୍ଠକୁ ତାଲା ପକାଇ ରଖିଛନ୍ତି। ଏଥିପାଇଁ ସତ୍ୟନଗର ଲେଡିଜ୍ ଫୋରମର ସଦସ୍ୟାମାନେ ଭୁବନେଶ୍ବର ମେୟରଙ୍କ ଦ୍ବାରସ୍ଥ ହୋଇଥିଲେ।ମେୟର ମଧ୍ୟ ସତ୍ୟନଗର ପାର୍କ ଠାରେ ଥିବା ପ୍ରକୋଷ୍ଠରେ ବସିବାକୁ ଅନୁମତି ଦେଇଥିଲେ। କିନ୍ତୁ ମେୟରଙ୍କ ଅନୁମତି ଥିବା ସତ୍ବେ ସେହି ପ୍ରକୋଷ୍ଠକୁ କିଛି ବ୍ୟକ୍ତି ତାଲା ପକାଇ ରଖିଥିଲେ। ବାଧ୍ୟହୋଇ ସତ୍ୟନଗର ଲେଡିଜ୍ ଫୋରମର ସଦସ୍ୟା ମାନେ ପ୍ରକୋଷ୍ଠ ବାହାରେ ବସିଥିଲେ।
ମହିଳାଙ୍କୁ ଏତେ ଅସମ୍ମାନ କଣ ପାଇଁ?ଆମେ କଣ ଏହାର ପ୍ରତିବାଦ କରିପାରିବୁ ନାହିଁ? ଆମକୁ କଣ ବସିବାକୁ ଖଣ୍ଡେ ଜାଗା ମିଳିବ ନାହିଁ? ଆମକୁ କଣ ନ୍ୟାୟ ମିଳିବ ନାହିଁ? ଏଭଳି ଅନେକ ପ୍ରଶ୍ନ କରିଛନ୍ତି ସତ୍ୟନଗର ଲେଡିଜ୍ ଫୋରମର ସଦସ୍ୟାମାନେ। ସେମାନଙ୍କୁ ନ୍ୟାୟ ପ୍ରଦାନ ପାଇଁ ଉଚ୍ଚ କର୍ତ୍ତୃପକ୍ଷ ସ୍ବତନ୍ତ୍ର ଦୃଷ୍ଟି ଦେବାକୁ ନିବେଦନ କରିଛନ୍ତି।