ସନାତନ ହିନ୍ଦୁ ଧର୍ମ ଆମର ପରିଚୟ, ଆମର ଗର୍ବ ଓ ଆମର ଆତ୍ମା”

ଭୁବନେଶ୍ୱର: ସନାତନ ହିନ୍ଦୁ ଧର୍ମର ମୂଲ୍ୟବୋଧକୁ ଉଜ୍ଜୀବିତ ରଖିବା ଏବଂ ସମାଜରେ ଏକତା ଓ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ସ୍ଥାନୀୟ ଭି.ଏସ୍.ଏସ୍.ନଗର ଅନ୍ତର୍ଗତ ଡି.ଏଲ୍. କଲୋନୀସ୍ଥିତ ମା’ ଭୁବନେଶ୍ୱରୀ ମନ୍ଦିର ପ୍ରାଙ୍ଗଣରେ ‘ସମଗ୍ର ହିନ୍ଦୁ ସମାଜ’ ପକ୍ଷରୁ ଏକ ଭବ୍ୟ ‘ସଂକ୍ରାନ୍ତି ମିଳନ’ କାର୍ଯ୍ୟକ୍ରମ ଆୟୋଜିତ ହେବାକୁ ଯାଉଛି। ହିନ୍ଦୁ ସଂସ୍କୃତି କେବଳ ଏକ ଧର୍ମ ନୁହେଁ, ବରଂ ଏହା ଆମର ପରିଚୟ ଏବଂ ଆତ୍ମା। ଏହି ଏକତାକୁ ସୁଦୃଢ଼ କରିବା ପାଇଁ ପରିବାରର ସମସ୍ତ ସଦସ୍ୟଙ୍କ ଉପସ୍ଥିତି ଏକାନ୍ତ ଆବଶ୍ୟକ। ଏହି “ସଂକ୍ରାନ୍ତି ମିଳନ” କେବଳ ଏକ କାର୍ଯ୍ୟକ୍ରମ ନୁହେଁ, ବରଂ ଏହା ସମାଜରେ ନୂତନ ଶକ୍ତି ସଂଚାର କରିବା ପାଇଁ ଏକ ପ୍ରୟାସ ବୋଲି ‘ସମଗ୍ର ହିନ୍ଦୁ ସମାଜ’ର କର୍ମକର୍ତ୍ତାମାନେ ମତବ୍ୟକ୍ତ କରିଛନ୍ତି।

“ସଂଗଠିତ ହିନ୍ଦୁ, ସମର୍ଥ ଭାରତ” ବାର୍ତ୍ତାକୁ ପାଥେୟ କରି ଆୟୋଜିତ ହେବାକୁ ଥିବା ଏହି ଆଧ୍ୟାତ୍ମିକ ସମାବେଶରେ ସମାଜର ବିଭିନ୍ନ ବର୍ଗର ଲୋକମାନେ ଏକତ୍ରିତ ହୋଇ ଧାର୍ମିକ ଐତିହ୍ୟର ସୁରକ୍ଷା ପାଇଁ ସଂକଳ୍ପ ଗ୍ରହଣ କରିବେ। ଆସନ୍ତାକାଲି (ଶୁକ୍ରବାର) ସନ୍ଧ୍ୟା ସମୟରେ ମନ୍ଦିର ପ୍ରାଙ୍ଗଣରେ ବିରାଜିତ ଶ୍ରୀ ହନୁମାନ ମହାପ୍ରଭୁଙ୍କ ନିକଟରେ ସାମୂହିକ ହନୁମାନ ଚାଳିଶା ପାଠ କରାଯିବା ନେଇ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି। ସନ୍ଧ୍ୟା ୬ ଘଟିକା ସମୟରେ ଗାୟତ୍ରୀ ପରିବାରର ସଦସ୍ୟମାନଙ୍କ ଦ୍ୱାରା ପ୍ରଦୀପ ପ୍ରଜ୍ୱଳନ କରାଯାଇ କାର୍ଯ୍ୟକ୍ରମର ଶୁଭାରମ୍ଭ କରାଯିବ।

ଏହାପରେ ସନ୍ଧ୍ୟା ୭ ଘଟିକାରେ ଶ୍ରଦ୍ଧାଳୁମାନଙ୍କ ଦ୍ୱାରା ସାମୂହିକ ଭାବେ ୨୧ ଥର ହନୁମାନ ଚାଳିଶା ପାଠ କରାଯିବାର କାର୍ଯ୍ୟସୂଚୀ ରହିଛି। ଏହି ସାମୂହିକ ପାଠ ମାଧ୍ୟମରେ ସମଗ୍ର ଅଞ୍ଚଳରେ ଏକ ଶୁଦ୍ଧ ଓ ଆଧ୍ୟାତ୍ମିକ ବାତାବରଣ ସୃଷ୍ଟି କରିବା ପାଇଁ ଲକ୍ଷ୍ୟ ରଖାଯାଇଛି। ରାତ୍ରି ୮ ଘଟିକା ସମୟରେ ‘ହିନ୍ଦୁ ଧର୍ମର ସୁରକ୍ଷା ଓ ପ୍ରାସଙ୍ଗିକତା’ ଶୀର୍ଷକ ବିଷୟବସ୍ତୁ ଉପରେ ଏକ ସ୍ୱତନ୍ତ୍ର ବୌଦ୍ଧିକ ଆଲୋଚନାଚକ୍ର ଅନୁଷ୍ଠିତ ହେବ। ଏହି ପର୍ଯ୍ୟାୟରେ ବିଶିଷ୍ଟ ବକ୍ତାମାନେ ଯୋଗଦେଇ ସନାତନ ପରମ୍ପରାକୁ ଆଗାମୀ ପିଢ଼ି ପାଇଁ କିଭଳି ସୁରକ୍ଷିତ ରଖାଯାଇପାରିବ ଏବଂ ସମାଜରେ ସାଂସ୍କୃତିକ ଚେତନା କିଭଳି ଜାଗ୍ରତ ହେବ, ସେ ସମ୍ପର୍କରେ ମାର୍ଗଦର୍ଶନ ପ୍ରଦାନ କରିବେ। ଶେଷରେ ରାତ୍ରି ୯ ଘଟିକାରେ ସମସ୍ତ ଭକ୍ତ ଓ ଶ୍ରଦ୍ଧାଳୁମାନେ ପ୍ରସାଦ ସେବନ କରିବେ।

‘ସମଗ୍ର ହିନ୍ଦୁ ସମାଜ’ର କର୍ମକର୍ତ୍ତା କହିଛନ୍ତି ଯେ ଧାର୍ମିକ ସଂସ୍କୃତିର ପ୍ରଚାର ଓ ପ୍ରସାର ସହ ଲୋକଙ୍କ ମଧ୍ୟରେ ଭାଇଚାରା ସୃଷ୍ଟି କରିବା ଏହି ମିଳନର ମୂଳ ଉଦ୍ଦେଶ୍ୟ। ଏହି ପବିତ୍ର “ସଂକ୍ରାନ୍ତି ମିଳନ” ଏବଂ ସାମୂହିକ ହନୁମାନ ଚାଳିଶା ପାଠ ଅବସରରେ ଡି.ଏଲ୍. କଲୋନୀ ଓ ଆଖପାଖ ଅଞ୍ଚଳର ସମସ୍ତ ଧର୍ମପ୍ରାଣ ଜନସାଧାରଣଙ୍କୁ ନିଜ ପରିବାର ସହ ଉପସ୍ଥିତ ରହି କାର୍ଯ୍ୟକ୍ରମର ମହିମା ବୃଦ୍ଧି କରିବାକୁ ନିମନ୍ତ୍ରଣ କରାଯାଇଛି। ଶ୍ରୀ ହନୁମାନଙ୍କ ପାଖରେ ସାମୂହିକ ପ୍ରାର୍ଥନା କରି ସମାଜର ମଙ୍ଗଳ କାମନା କରିବା ପାଇଁ ଏହା ଏକ ଅନନ୍ୟ ସୁଯୋଗ। ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ଏହି ସଂକ୍ରାନ୍ତି ମିଳନକୁ ସଫଳ କରିବା ପାଇଁ ସ୍ଥାନୀୟ ଯୁବପିଢ଼ି ଓ ବରିଷ୍ଠ ନାଗରିକମାନଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ଧର୍ମ ଓ ସଂସ୍କୃତିର ଏହି ଜୟଯାତ୍ରାରେ ସମସ୍ତଙ୍କ ସହଯୋଗ କାମନା କରାଯାଇଛି।