ଭୁବନେଶ୍ୱର: ଆଜି ରାଜ୍ୟସାରା ଘରେ ଘରେ ଉତ୍ସାହ ଓ ଭକ୍ତିର ମାଧୁର୍ଯ୍ୟରେ ପାଳନ ହେଉଛି ସାବିତ୍ରୀ ଅମାବାସ୍ୟା। ଏହି ଦିନଟିରେ ବିବାହିତା ମହିଳାମାନେ ସ୍ବାମୀଙ୍କ ଦୀର୍ଘାୟୁ ଓ ମଙ୍ଗଳ କାମନା କରି ବ୍ରତ ରଖିଥାନ୍ତି। ହିନ୍ଦୁ ପୌରାଣିକ କଥାଅନୁସାରେ, ସାବିତ୍ରୀ ଯମରାଜଙ୍କ ପଛରେ ଯାଇ ସ୍ବାମୀ ସତ୍ୟବାନଙ୍କୁ ମୃତ୍ୟୁରୁ ଫେରାଇ ଆଣିଥିଲେ। ସେହି ଶ୍ରଦ୍ଧା ଓ ଆଶା କୁ ମନେ ପକାଇ ଘରେ ଘରେ ବ୍ରତ ତଥା ପାଠ ଓ ପୂଜାର୍ଚ୍ଚନା ହେଉଛି।
ସକାଳୁ ସକାଳୁ ଦେବାଳୟ ଓ ପୀଠମାନେ ଶ୍ରଦ୍ଧାଳୁଙ୍କ ଭିଡରେ ଜନସାଗରର ଆକାର ନେଇଥିଲା। ମହିଳାମାନେ ନୂଆ ଶାଢୀ, ସଙ୍ଖା, ସିନ୍ଦୁର ଓ ଅଳତା ପିନ୍ଧି ଭୋଗ ଓ ପୂଜା ସାମଗ୍ରୀ ହାତରେ ନେଇ ଦେବାଳୟ ଦର୍ଶନରେ ଯୋଗଦେଇଛନ୍ତି। ଘରେ ଘରେ ସାବିତ୍ରୀଙ୍କ ମୂର୍ତ୍ତି ଗଢି ପାରମ୍ପରିକ ରୀତିରେ ବ୍ରତ କଥା ଗାଇ ପୂଜା କରାଯାଉଛି।
ପୂଜାରେ ବ୍ୟବହୃତ ଫଳ ମଧ୍ୟରେ ଆମ୍ବ, ପଣସ, ତାଳ, ଖଜୁରୀ, ନଡିଆ, ଫୁଟି କାକୁଡି ପ୍ରମୁଖ ଦେଶୀ ଫଳ ଅନ୍ୟତମ। ସମ୍ପୂର୍ଣ୍ଣ ଦିନ ଉପବାସ ରଖି ସନ୍ଧ୍ୟା ବେଳେ ପତିଙ୍କ ପାଦ ପ୍ରକ୍ଷାଳନ କରି ପୂଜା ସମାପନ କରନ୍ତି ସଧବା ମହିଳାମାନେ।
ସାବିତ୍ରୀ ବ୍ରତ ହେଉଛି ଦାମ୍ପତ୍ୟ ଜୀବନର ଭକ୍ତି, ନିଷ୍ଠା ଓ ଆଶା ର ପ୍ରତୀକ। ଏହି ବ୍ରତ ମାଧ୍ୟମରେ ସଧବା ମହିଳାମାନେ ସେଇ ପୌରାଣିକ ଆଦର୍ଶକୁ ଆଜି ବି ଜୀବନରେ ପ୍ରୟୋଗ କରୁଛନ୍ତି।
ଉପସ୍ଥାପନା: ଶୁଭସ୍ମିତା ପ୍ରଧାନ