ପୂର୍ତ୍ତ ବିଭାଗରେ ଆସିବ ବୈଷୟିକ ସଂସ୍କାର, e-IB ଡିଜିଟାଲ ପ୍ଲାଟଫର୍ମର ହେବ ଶୁଭାରମ୍ଭ

ଭୁବନେଶ୍ୱର: ରାଜ୍ୟ ପୂର୍ତ୍ତ ବିଭାଗର କାର୍ଯ୍ୟଧାରାକୁ ସମ୍ପୂର୍ଣ୍ଣ ରୂପାନ୍ତରିତ କରିବା ସହ ଏଥିରେ ବୈଷୟିକ ସଂସ୍କାର ଆଣିବା ପାଇଁ ଏକ ବଡ଼ ପଦକ୍ଷେପ ନିଆଯାଇଛି। ଲୋକସେବା ଭବନସ୍ଥିତ କନଭେନସନ ହଲ୍ ପରିସରରେ ଆୟୋଜିତ ହେବାକୁ ଥିବା ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଦ୍ୱାରା ବହୁପ୍ରତୀକ୍ଷିତ e-IB ଏବଂ CDMS 3.0 ଡିଜିଟାଲ ପ୍ଲାଟଫର୍ମର ଶୁଭାରମ୍ଭ ହେବାକୁ ଯାଉଛି। ଏହି ଅଭିନବ ବ୍ୟବସ୍ଥା ଦ୍ୱାରା ବିଭାଗୀୟ ଡାକବଙ୍ଗଳାଗୁଡ଼ିକର ସଂରକ୍ଷଣ ଠାରୁ ଆରମ୍ଭ କରି ଠିକାଦାରମାନଙ୍କ ତଥ୍ୟ ପରିଚାଳନା ପର୍ଯ୍ୟନ୍ତ ସମସ୍ତ ପ୍ରକ୍ରିୟା ଅଧିକ ସ୍ୱଚ୍ଛ ଓ ସରଳ ହେବ। ଏହି ଡିଜିଟାଲ୍ ରୂପାନ୍ତରଣ ପୂର୍ତ୍ତ ବିଭାଗର ଦକ୍ଷତା ବୃଦ୍ଧି କରିବା ସହ ସାଧାରଣ ଜନତାଙ୍କୁ ତ୍ୱରିତ ସେବା ଯୋଗାଇବାରେ ଏକ ମାଇଲଖୁଣ୍ଟ ସଦୃଶ ହେବ।

ପ୍ଲାଟଫର୍ମ ଉନ୍ମୋଚନ ସହିତ ମନ୍ତ୍ରୀ ଶ୍ରୀ ହରିଚନ୍ଦନ ବିଭାଗର ଅନ୍ୟ ଏକ ଗୁରୁତ୍ୱପୂର୍ଣ୍ଣ ଦିଗ ଉପରେ ମଧ୍ୟ ସମୀକ୍ଷା କରିବେ। ବିଶେଷ କରି ରାଜ୍ୟରେ ଚାଲିଥିବା ୫୦ କୋଟି ଟଙ୍କାରୁ ଊର୍ଦ୍ଧ୍ୱ ବ୍ୟୟ ଅଟକଳର ବୃହତ ଭିତ୍ତିଭୂମି ପ୍ରକଳ୍ପଗୁଡ଼ିକର ଅଗ୍ରଗତି ନେଇ ବିଭାଗୀୟ ଯନ୍ତ୍ରୀ ଓ ବରିଷ୍ଠ ଅଧିକାରୀମାନଙ୍କ ସହ ସେ ପୁଙ୍ଖାନୁପୁଙ୍ଖ ଆଲୋଚନା କରିବେ। ପ୍ରକଳ୍ପଗୁଡ଼ିକୁ ନିର୍ଦ୍ଧାରିତ ସମୟ ମଧ୍ୟରେ ଶେଷ କରିବା ଏବଂ କାର୍ଯ୍ୟର ମାନ ବଜାୟ ରଖିବା ଉପରେ ଏହି ବୈଠକରେ ବିଶେଷ ଗୁରୁତ୍ୱ ଦିଆଯିବ।