ନୂଆଦିଲ୍ଲୀ, ୧୭।୧ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଞ୍ଜାବ ଗସ୍ତ ସମୟରେ ହୋଇଥିବା ସୁରକ୍ଷା ବ୍ୟବସ୍ଥାର ଉଲ୍ଲଂଘନ ମାମଲାର ଯାଞ୍ଚ କରୁଥିବା ସୁପ୍ରିମକୋର୍ଟର ଅନୁସନ୍ଧାନ କମିଟିର ଅଧ୍ୟକ୍ଷ ଅବସରପ୍ରାପ୍ତ ବିଚାରପତି ଇନ୍ଦୁ ମଲହୋତ୍ରା ଧମକ ଦିଆଯାଇଛି। ଶିଖ ଫର୍ ଜଷ୍ଟିସ (ଏସ୍ଏଫ୍ଜେ) ସଂଗଠନ ପକ୍ଷରୁ ତାଙ୍କୁ ଏହି ଧମକ ମିଳିଥିବା କୁହାଯାଉଛି। ଏହି ସଂଗଠନ ପକ୍ଷରୁ ଧମକପୂର୍ଣ୍ଣ ଅଡିଓ କ୍ଲିପ ଜାରି ହୋଇଛି।
ପ୍ରଧାନମନ୍ତ୍ରୀ ଏବଂ ଶିଖଙ୍କ ମଧ୍ୟରୁ ତାଙ୍କୁ ବାଛିବାକୁ ପଡ଼ିବ ବୋଲି ଧମକପୂର୍ଣ୍ଣ ଅଡ଼ିଓ କ୍ଲିପ୍ରେ କୁହାଯାଇଛି। ଏହା ପୂର୍ବରୁ ମଧ୍ୟ ସୁପ୍ରିମକୋର୍ଟର ବହୁ ଆଇନଜୀବୀଙ୍କୁ ଏହି ପ୍ରସଙ୍ଗରେ ଧମକପୂର୍ଣ୍ଣ କଲ ମିଳିଥିଲା। ଏଥିରୁ ଦୂରେଇ ରହିବାକୁ ସେମାନଙ୍କୁ କୁହାଯାଇଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଞ୍ଜାବ ଗସ୍ତ ସୁରକ୍ଷା ଅବହେଳା ନେଇ ସୁପ୍ରିମକୋର୍ଟ ଏକ କମିଟି ଘୋଷଣା କରିଛନ୍ତି। ପୂର୍ବତନ ବିଚାରପତି ଇନ୍ଦୁ ମାଲହୋତ୍ରାଙ୍କ ଅଧ୍ୟକ୍ଷତାରେ ପାଞ୍ଚ ଜଣିଆ କମିଟି ଗଠନ କରାଯାଇଛି।
ଧମକ ମଳିବା ପରେ ସୁପ୍ରିମକୋର୍ଟର ବାର୍ ଆସୋସିଏଶନ ପକ୍ଷରୁ ଜଷ୍ଟିସ ଇନ୍ଦୁ ମଲହୋତ୍ରାଙ୍କୁ ଏକ ଚିଠି ଲେଖି ପ୍ରଧାନମନ୍ତ୍ରୀଙ୍କ ସୁରକ୍ଷା ଅବହେଳାକୁ ନେଇ ଆଇନଜୀବୀଙ୍କୁ ମିଳିଥିବା ଧମକର ଯାଞ୍ଚ କରିବାକୁ ଦାବି କରାଯାଇଛି।
ପ୍ରଧାନମନ୍ତ୍ରୀଙ୍କ ସୁରକ୍ଷାକୁ ନେଇ ଚାଲିଥିବା ଶୁଣାଣିରେ ଅଂଶଗ୍ରହଣ ନ କରିବାକୁ ଆଇନଜୀବୀମାନଙ୍କୁ ଧମକ ଦିଆଯାଇଛି। ଧମକରେ କୁହାଯାଇଛି ଯେ, ୧୯୮୪ ଶିଖ ଦଙ୍ଗା ଏବଂ ଜନଶୁଣାଣିରେ ଜଣେ ହେଲେ ଦୋଷୀଙ୍କୁ ମଧ୍ୟ ଦଣ୍ଡ ଦିଆଯାଇ ନାହିଁ। ତେଣୁ, ଏହି ପ୍ରସଙ୍ଗର ଶୁଣାଣି କରାଯିବା ଉଚିତ ନୁହେଁ ବୋଲି ଧମକ ଦିଆଯାଇଛି।