ଜାମ୍ମୁ: ଜାମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରଠାରୁ ପାକିସ୍ତାନ ଭାରତରେ ଅଶାନ୍ତି ସୃଷ୍ଟି କରିବା ଲାଗି ବିଭିନ୍ନ ପ୍ରକାର ଷଡ଼ଯନ୍ତ୍ର ରଚିବାରେ ଲାଗିଛି। ଏଥିପାଇଁ ସୀମାନ୍ତରେ ସୁଡ଼ଙ୍ଗ ଖୋଳି ଜାମ୍ମୁ-କାଶ୍ମୀରକୁ ଆତଙ୍କବାଦୀଙ୍କୁ ଅନୁପ୍ରବେଶ କରାଉଛି। ଶନିବାର ପୁଣି ଏକ ସୁଡ଼ଙ୍ଗ ଠାବ ହୋଇଛି, ଯେଉଁବାଟେ ଆତଙ୍କବାଦୀମାନେ ପାକିସ୍ତାନରୁ ଭାରତକୁ ଅନୁପ୍ରବେଶ କରୁଥିବା ଜଣାପଡ଼ିଛି।
ଶନିବାର ଠାବ ହୋଇଥିବା ସୁଡ଼ଙ୍ଗର ଲମ୍ବ ପ୍ରାୟ ୧୫୦ ମିଟର ହେବ। ବିଏସଏଫ ଯବାନମାନେ ହୀରାନଗରର ପାନସର ଅଞ୍ଚଳରେ ପାଟ୍ରୋଲିଂ କରୁଥିବା ସମୟରେ ଏହି ସୁଡ଼ଙ୍ଗ ଠାବ କରିଛନ୍ତି। ପାକିସ୍ତାନୀ ଗୁଇନ୍ଦା ବିଭାଗ ଏହି ସୁଡ଼ଙ୍ଗ ବାଟେ ଆତଙ୍କୀଙ୍କୁ ଭାରତ ପଠାଉଥିଲା। ଏହା ଗତ ୧୦ ଦିନ ମଧ୍ୟରେ ବିଏସଏଫ ଦ୍ବାରା ଠାବ ହୋଇଥିବା ୨ୟ ସୁଡ଼ଙ୍ଗ।
ଅଧିକାରୀଙ୍କ ସୂଚନା ଅନୁସାରେ, ଏହି ସୁଡ଼ଙ୍ଗ ବିଷୟରେ ବିଶିଷ୍ଟ ସୂତ୍ରରୁ ସେନାକୁ ଖବର ମିଳିଥିଲା। ଏହା ପରେ ବିଏସଏଫ ପକ୍ଷରୁ ପନସର ଅଞ୍ଚଳରେ ଆଣ୍ଟି ଟନେଲିଂ ଡ୍ରାଇଭ ଆରମ୍ଭ କରି ଏହାକୁ ଠାବ କରିଥିଲା। ଏହି ସୁଡ଼ଙ୍ଗ ଭୂପୃଷ୍ଠରୁ ୩୦ ଫୁଟ ଗଭୀରରେ ଖୋଳାଯାଇଛି। ଏହାକୁ ମିଶାଇ ଜାମ୍ମୁ ଅଞ୍ଚଳରୁ ବର୍ତ୍ତମାନ ସୁଦ୍ଧା ୧୦ଟି ସୁଡ଼ଙ୍ଗ ଠାବ ହେଲାଣି।