ଭୁବନେଶ୍ୱର,୨୪ା୨(ବ୍ୟୁରୋ): ରାଷ୍ଟ୍ରପତି ନିର୍ବାଚନ ଲାଗି ଏବେଠାରୁ ପ୍ରକ୍ରିୟା ଆରମ୍ଭ ହୋଇଯାଇଛି। ଜୁଲାଇରେ ହେବାକୁ ଥିବା ଏହି ନିର୍ବାଚନ ସକାଶେ ଓଡ଼ିଶା ବିଧାନସଭାର ଦୁଇଜଣ ଅଫିସର ଆସିଷ୍ଟାଣ୍ଟ ରିଟର୍ନିଂ ଅଫିସର(ଏଆର୍ଓ) ଭାବେ ନିଯୁକ୍ତ ହେବେ । ହେଲେ ଦୁଇ ଜଣଙ୍କ ମଧ୍ୟରୁ ରାଷ୍ଟ୍ରପତି ନିର୍ବାଚନ ଲାଗି ବିଧାନସଭା ବ୍ୟବସ୍ଥାପିକା ବ୍ରାଞ୍ଚ ଅନୁସଚିବ ରଙ୍ଗାଧର ମଲ୍ଲିକଙ୍କୁ ଆସିଷ୍ଟାଣ୍ଟ ରିଟର୍ନିଂ ଅଫିସର ଭାବେ ନିଯୁକ୍ତି ଦେବାକୁ ବିଧାନସଭା ତରଫରୁ ରାଜ୍ୟ ନିର୍ବାଚନ କମିଶନଙ୍କ ଜରିଆରେ ରାଜ୍ୟ ସଭାକୁ ପ୍ରସ୍ତାବ ପଠାଯାଇଛି। ନିୟମାନୁଯାୟୀ, ନିର୍ବାଚନ କମିଶନଙ୍କ ପକ୍ଷରୁ ୨ ଜଣ ରିଟର୍ନିଂ ଅଫିସର ନିଯୁକ୍ତ କରିବା ଲାଗି ଚିଠିରେ ନିର୍ଦ୍ଦେଶ ଦିଆଯାଇଥିଲା। ଏଥିଲାଗି ମଧ୍ୟ କିଛି ନିର୍ଦ୍ଦିଷ୍ଟ ନିୟମ ରହିଛି। ଯେଉଁମାନଙ୍କ କାର୍ଯ୍ୟକାଳକୁ ଆଉ ୬ ମାସରୁ ଅଧିକ ଦିନ ରହିଥିବ ସେମାନଙ୍କ ନାମ ଏଥିଲାଗି ପ୍ରସ୍ତାବ ରହିବା କଥା। ବିଧାନସଭା ସଚିବଙ୍କ ସହିତ ଆଉ ଜଣଙ୍କ ନାମ ଏଥିପାଇଁ ବଛାଯାଇଥାଏ। ହେଲେ ବିଧାନସଭା ସଚିବ ଦାଶରଥୀ ଶତପଥୀଙ୍କ କାର୍ଯ୍ୟକାଳ ଶେଷ ହୋଇସାରିଛି। ଗତ ଫେବୃୟାରୀ ଆରମ୍ଭରୁ ସେ ଅତିରିକ୍ତ ବର୍ଷେ ପାଇଁ ବିଧାନସଭାର ଓଏସ୍ଡି(ଅଫିସର ଅନ୍ ସ୍ପେଶାଲ ଡ୍ୟୁଟି) କମ୍ ସଚିବ ଭାବେ ଦାୟିତ୍ୱରେ ଅଛନ୍ତି। ଯେହେତୁ ସେ ଅବସର ନେଇସାରିଛନ୍ତି ତାଙ୍କୁ ଆସିଷ୍ଟାଣ୍ଟ ରିଟର୍ନିଂ ଅଫିସର ଭାବେ ନିଯୁକ୍ତି ଦିଆଯାଇପାରିବ ନା ନାହିଁ ସେନେଇ ନିର୍ବାଚନ କମିଶନଙ୍କ ମତାମତ ଲୋଡ଼ାଯାଇଛି। ଏନେଇ ରାଜ୍ୟ ନିର୍ବାଚନ କମିଶନଙ୍କୁ ବିଧାନସଭା ପକ୍ଷରୁ ସ୍ବତନ୍ତ୍ର ଭାବେ ଚିଠି ଲେଖି ଅବଗତ କରାଯାଇଛି। ଅନ୍ୟପଟେ ଯଦି ବିଧାନସଭା ସଚିବଙ୍କ ନାମକୁ ଅଗ୍ରାହ୍ୟ କରିଦିଆଯାଏ ତେବେ ରାଜ୍ୟ ସରକାର ସେହି ପଦବୀର କୌଣସି ଅଫିସର ଯିଏ ରାଜ୍ୟ ସଭା ପକ୍ଷରୁ ଆସିଥିବା ନିର୍ଦ୍ଦେଶାବଳୀ ଅନୁଯାୟୀ ନିଯୁକ୍ତ ହୋଇପାରିବେ ସେଭଳି କାହାରି ଜଣଙ୍କ ନାମ ପ୍ରସ୍ତାବ ଆକାରରେ ନିର୍ବାଚନ କମିଶନଙ୍କ ଜରିଆରେ ରାଜ୍ୟ ସଭାକୁ ପଠାଇପାରନ୍ତି ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି। ଏହାସହ ଇଲେକ୍ଟ୍ରୋରାଲ କଲେଜରେ କେଉଁମାନେ ଭାଗନେବେ ସେନେଇ ସମସ୍ତ ତଥ୍ୟ କେନ୍ଦ୍ର ନିର୍ବାଚନ କମିଶନଙ୍କୁ ଦିଆଯାଇଛି।