ଭୁବନେଶ୍ୱର,୬ା୨: ବନ୍ଦ ହୋଇପଡ଼ିଥିବା ବୀମାଗୁଡ଼ିକର ପୁନଃ ଆରମ୍ଭ ପାଇଁ ପଲିସିଧାରୀଙ୍କୁ ଆଉ ଏକ ସୁଯୋଗ ପ୍ରଦାନ କରୁଛି ଭାରତୀୟ ଜୀବନ ବୀମା ନିଗମ (ଏଲ୍ଆଇସି)। କୋଭିଡ୍ ମହାମାରୀ ଯୋଗୁ ଆର୍ଥିକ ସମସ୍ୟାର ସମ୍ମୁଖୀନ ହେଉଥିବା ବୀମାଧାରୀଙ୍କୁ କ୍ରମାଗତ ରିସ୍କ କଭର ପାଇଁ ଏଲ୍ଆଇସି ପକ୍ଷରୁ ଏପରି ପଦକ୍ଷେପ ନିଆଯାଇଛିି। ଚଳିତ ଆର୍ଥିକ ବର୍ଷରେ ୨ୟ ଥର ପାଇଁ ଏଭଳି ସୁଯୋଗ ନିଗମ ପକ୍ଷରୁ ଦିଆଯାଉଛି। ନିଗମର ଏହି ସ୍ବତନ୍ତ୍ର ଅଭିଯାନ ଚଳିତ ବର୍ଷ ୭ଫେବୃୟାରୀରୁ ୨୫ ମାର୍ଚ୍ଚ ପର୍ଯ୍ୟନ୍ତ ଉପଲବ୍ଧ ହେବ। ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି ଏଭଳି ସୁଯୋଗ ସହ ବିଳମ୍ବ ଶୁଳ୍କରେ ରିହାତି ପ୍ରଦାନ କରାଯିବ ବୋଲି ନିଗମ ପକ୍ଷରୁ କୁହାଯାଇଛି।
ବୀମା ପ୍ରଦାନ କରାଯାଇଥିବା ମୋଟ ପ୍ରିମିୟମ ଉପରେ ନିର୍ଭରକରି ଟର୍ମ ନିଶ୍ଚିତତା ଏବଂ ହାଇ ରିସ୍କ ଯୋଜନା ସହ ଚିକିତ୍ସା ଆବଶ୍ୟକତା ଉପରେ କୌଣସି ରିହାତି ରହିବ ନାହିଁ। ସେହିଭଳି ଯୋଗ୍ୟ ସ୍ବାସ୍ଥ୍ୟ ଏବଂ ମାଇକ୍ରୋ ଇନ୍ସ୍ୟୁରାନ୍ସର ଯୋଜନାଗୁଡିକ ମଧ୍ୟ ବିଳମ୍ବିତ ଫି’ରେ ରିହାତି ପାଇଁ ବିବେଚିତ ହେବେ। ଏହି ଅଭିଯାନ ଅଧୀନରେ ନିର୍ଦ୍ଦିଷ୍ଟ ଯୋଗ୍ୟ ଯୋଜନାଗୁଡିକର ନୀତି ପରିିବର୍ତ୍ତନ ହୋଇପାରେ। ଏହି ସୁବିଧା ନିର୍ଦ୍ଦିଷ୍ଟ ସର୍ତ୍ତାବଳୀ ଅନୁଯାୟୀ ପ୍ରଥମ ଅନାଦାୟ ପ୍ରିମିୟମ ତାରିଖଠାରୁ ୫ ବର୍ଷ ମଧ୍ୟରେ ଗ୍ରହଣ କରାଯିବ।
ନିଗମର ସୂଚନା ଅନୁସାରେ ୧ଲକ୍ଷ ଟଙ୍କା ପର୍ଯ୍ୟନ୍ତ ବୀମା ଉପରେ ୨୦% ବିଳମ୍ବ ରିହାତି ଏବଂ ୨୦୦୦ ଟଙ୍କାର ସର୍ବାଧିକ ରିହାତି ରହିଛି। ସେହିଭଳି ୧,୦୦,୦୦୧ ରୁ ୩,୦୦,୦୦୦ ପର୍ଯ୍ୟନ୍ତ ବୀମା ଉପରେ ୨୫% ବିଳମ୍ବ ରିହାତି ଓ ୨,୫୦୦ ଟଙ୍କାର ସର୍ବାଧିକ ରିହାତି ମିଳିବ। ସେହିପରି ୩,୦୦,୦୦୧ ରୁ ଊର୍ଦ୍ଧ୍ୱ ବୀମା ଉପରେ ୩୦% ବିଳମ୍ବ ରିହାତି ଅଥବା ୩୦୦୦ ଟଙ୍କାର ସର୍ବାଧିକ ରିହାତି ପାଇପାରିବ। ଅପରପକ୍ଷରେ ମାଇକ୍ରୋ ଇନ୍ସ୍ୟୁରାନ୍ସ ଯୋଜନାଗୁଡ଼ିକରେ ୧୦୦% ବିଳମ୍ବ ଫି’ ରେ ରିହାତି ଏବଂ ସମ୍ପୂର୍ଣ୍ଣ ସର୍ବାଧିକ ରିହାତି ମିଳିବ।