ଗଞ୍ଜାମ: ଗଞ୍ଜାମ ଜିଲ୍ଲା କବିସୂର୍ଯ୍ୟ ନଗର ଥାନା ଅଧୀନ ଗୋବିନ୍ଦପୁର ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଏଠାରେ ସ୍ତ୍ରୀଙ୍କ ଛୁରା ମାଡ଼ରେ ସ୍ବାମୀଙ୍କ ମୃତ୍ୟୁ ଘଟିଥିବା ଅଭିଯୋଗ ମିଳିଛି । ମୃତ ବ୍ୟକ୍ତି ୩୫ ବର୍ଷୀୟ କାଳିଆ ସେଠୀ ବୋଲି ପରିଚୟ ମିଳିଛି ।
ସ୍ଥାନୀୟ ସୂଚନା ଅନୁଯାୟୀ, କାଳିଆ ସେଠୀ ୧୫ ବର୍ଷ ପୂର୍ବେ ପୋଲସରା ଡିମ୍ୱିରିଆ ଗ୍ରାମର ପୂଜା ସେଠୀ ସହିତ ପ୍ରେମ ବିବାହ କରିଥିଲେ । କିଛି ଦିନ ହେଉଛି, ସ୍ତ୍ରୀ ପୂଜାଙ୍କ ମୋବାଇଲ ମାଧ୍ୟମରେ ଅନ୍ୟ ବ୍ୟକ୍ତିଙ୍କ ସହ କଥା ହେଉଥିବା ନେଇ ସ୍ବାମୀ ସନ୍ଦେହ କରୁଥିଲେ । ଏନେଇ ସେମାନଙ୍କ ମଧ୍ୟରେ ପ୍ରତିଦିନ ଝଗଡ଼ା ଚାଲିଥିଲା ।
ପରିବାର ସଦସ୍ୟଙ୍କ ଅଭିଯୋଗ ଅନୁଯାୟୀ, ଗତ ରାତିରେ କାଳିଆ ଘରେ ଶୋଇଥିବା ବେଳେ ପୂଜା ତାଙ୍କୁ ଛୁରା ମାଡ଼ କରି ହତ୍ୟା କରିଥିଲେ । ଘଟଣା ସମ୍ବଦ୍ଧରେ ସୂଚନା ମିଳିବା ପରେ କବିସୂର୍ଯ୍ୟନଗର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିଥିଲେ ଏବଂ ମାମଲାର ତଦନ୍ତ ଆରମ୍ଭ କରିଛନ୍ତି । ଅଭିଯୁକ୍ତା ପୂଜା ସେଠୀ ବିରୁଦ୍ଧରେ ଆଇନନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ସୂଚନା ଦେଇଛି। ଏହି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।
ରିପୋର୍ଟ: ଶୁଭସ୍ମିତା ପ୍ରଧାନ