ଅହମ୍ମଦାବାଦ୍,୨୯।୪ : ସାମ୍ନାରେ ଥିଲା ୧୫୫ ରନ୍ର ଚ୍ୟାଲେଞ୍ଜିଂ ବିଜୟ ଲକ୍ଷ୍ୟ। କିନ୍ତୁ ଏହାକୁ ଅତି ସାଧାରଣ ଟାର୍ଗେଟରେ ପରିଣତ କରି ଦେଇଥିଲା ଦିଲ୍ଲୀ କ୍ୟାପିଟାଲ୍ସ ଓପନର ପୃଥ୍ବୀ ଶ’ଙ୍କ ଆଟାକିଂ ବ୍ୟାଟିଂ। ସେ ପ୍ରଥମ ଓଭରରେ ଶିଭମ ମାଭିଙ୍କୁ ଲଗାଇଥିଲେ କ୍ରମାଗତ ୬ ଚୌକା। ହଜାଇ ଦେଲେ ବୋଲରଙ୍କ ନିଦ। ମାତ୍ର ୧୮ଟି ବଲରେ ଅର୍ଦ୍ଧଶତକ ପୂରଣ କରିଥିଲେ। ଚଳିତ ଆଇପିଏଲରେ ଏହା ଥିଲା ଯେ କୌଣସି ବ୍ୟାଟ୍ସମ୍ୟାନଙ୍କ ପାଇଁ ଦ୍ରୁତତମ ଅର୍ଦ୍ଧଶତକ। ପାଟ କୁମିନ୍ସଙ୍କ ଦ୍ୱାରା ଆଉଟ୍ ହେବା ପୂର୍ବରୁ ଶ’ ୪୧ ବଲରେ ୨୦୦ ଷ୍ଟ୍ରାଇକରେଟ୍ରେ ଖେଳିଥିଲେ ୮୨ (୧୧ ଚୌକା ଓ ୩ ଛକା) ରନ୍ର ପାଳି। ଫଳରେ ଦିଲ୍ଲୀ ୧୬.୩ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରିନେଇଥିଲା। ପୃଥ୍ବୀଙ୍କ ଛଡ଼ା ଶିଖର ଧାଓ୍ବନ ୪୬ ଓ ଅଧିନାୟକ ରିଷଭ ପନ୍ତ ୧୬ ରନ୍ କରିଥିଲେ। କେକେଆର୍ର ଏକମାତ୍ର ସଫଳ ବୋଲର ଭାବେ କୁମିନ୍ସ ହାତେଇଥିଲେ ୩ ଉଇକେଟ।
ପ୍ରଥମେ ବ୍ୟାଟିଂ କରିଥିବା କେକେଆର କ୍ରମାଗତ ବ୍ୟବଧାନରେ ଉଇକେଟ ହରାଇବାରୁ ବଡ଼ ସ୍କୋର ହାସଲ କରିପାରି ନ ଥିଲା। ଶେଷ ଆଡ଼କୁ ଆନ୍ଧ୍ରେ ରସେଲଙ୍କ ବିସ୍ଫୋରକ ୪୫ (୪ ଚୌକା ଓ ୨ ଛକା) ରନ୍ର ଇନିଂସ ଯୋଗୁ କେକେଆର୍ ୬ ଉଇକେଟ ହରାଇ ୧୫୪ ରନ୍ କରିପାରିଥିଲା। ଅନ୍ୟମାନଙ୍କ ମଧ୍ୟରେ ଶୁବମାନ ଗିଲ୍ ୪୩ ରନ୍ କରିଥିଲେ।