ନୂଆଦିଲ୍ଲୀ : ୧୫ ଦିନ ପୂର୍ବେ ପହଲଗାମରେ ପାକିସ୍ତାନୀ ଆତଙ୍କବାଦୀମାନେ ଭାରତୀୟ ମହିଳାଙ୍କ କପାଳରୁ ଯେଉଁ ସିନ୍ଦୁର ପୋଛି ଦେଇଥିଲେ, ଭାରତ ତାହାର ପ୍ରତିଶୋଧ ନେଇଛି। ୬ ମଇ ମଧ୍ୟବର୍ତ୍ତୀ ରାତିରେ, ଦେଶର ସଶସ୍ତ୍ର ବାହିନୀ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ଶିବିର ଉପରେ ଆକ୍ରମଣ କରିଥିଲେ। ଘାତକ ଡ୍ରୋନ୍ ଏବଂ କ୍ଷେପଣାସ୍ତ୍ର ବ୍ୟବହାର କରି ଏହି ଆକ୍ରମଣରେ ନଅଟି ସ୍ଥାନରେ ଆତଙ୍କବାଦୀ ଭିତ୍ତିଭୂମି ଧ୍ୱଂସ କରାଯାଇଥିଲା।
ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ପ୍ରତିଶୋଧ ନେବ ତାହା ପାକିସ୍ତାନ ଜାଣିଥିଲା। ସେଥିପାଇଁ ସେ ଆର୍ଲଟ ହୋଇ ରହିଥିଲା। ଯେଉଁଥି ପାଇଁ ଭାରତ ସଠିକ ସମୟ ଖୋଜୁଥିଲା। ଯୋଜନା ମୁତାବକ ଭାରତ ତାର ସବୁ କାମ ଆଗକୁ ବଢାଉଥିଲା। ଏହି ଯୋଜନା ମତାବକ ଭାରତ ଆଜି ଅର୍ଥାତ ୭ ମଇରେ ସାରା ଦେଶର ୨୯୫ ଅଞ୍ଚଳରେ ମକ୍ ଡ୍ରିଲ୍ କରିବାକୁ ଘୋଷଣା କରିଥିଲା। ଗୃହ ମନ୍ତ୍ରଣାଳୟ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ନାଗରିକ ପ୍ରତିରକ୍ଷା ବ୍ୟବସ୍ଥାର ପ୍ରସ୍ତୁତି ମୂଲ୍ୟାଙ୍କନ ଏବଂ ଉନ୍ନତି କରିବା ପାଇଁ ଏହା ମକ୍ ଡ୍ରିଲ୍ କରିବାକୁ ନିର୍ଦ୍ଦେଶ ଦେଇଥିଲା। ଆଉ ଭାରତର ଏହି ମକ୍ ଡ୍ରିଲ୍ ଉପରେ ପାକିସ୍ତାନ ନଜର ରଖିଥିବା ବେଳେ ଭାରତ ରାତି ଅଧରେ ଏୟାର ଷ୍ଟ୍ରାଇକ୍ କରି ପାକିସ୍ତାନକୁ ଭକୁଆ ବନେଇଥିବା ଚର୍ଚ୍ଚା ହେଉଛି।
ଏହି ପଦକ୍ଷେପ କାହିଁକି ଆବଶ୍ୟକ ଥିଲା?
୨୨ ଏପ୍ରିଲ ୨୦୨୫ରେ କାଶ୍ମୀରର ପହଲଗାମରେ ପର୍ଯ୍ୟଟକଙ୍କ ଉପରେ ଏକ ଆତଙ୍କବାଦୀ ଆକ୍ରମଣ ହୋଇଥିଲା। ଏଥିରେ ୨୫ ଜଣ ପର୍ଯ୍ୟଟକ ଏବଂ ଜଣେ ନେପାଳୀ ନାଗରିକ ପ୍ରାଣ ହରାଇଥିଲେ। ଏହା ପରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ପଷ୍ଟ କରିଥିଲେ ଯେ ଭାରତ ଏହାର ଜବାବ ଦେବ। ପରବର୍ତ୍ତୀ ସମୟରେ, ୨୯ ଏପ୍ରିଲରେ ତିନି ସେନା ମୁଖ୍ୟ, ସିଡିଏସ୍ ଏବଂ ଜାତୀୟ ସୁରକ୍ଷା ପରାମର୍ଶଦାତାଙ୍କ ସମେତ ବରିଷ୍ଠ ମନ୍ତ୍ରୀମାନଙ୍କ ସହିତ ଏକ ବୈଠକରେ ପ୍ରଧାନମନ୍ତ୍ରୀ କହିଥିଲେ ଯେ ଭାରତ କିପରି ଏବଂ କେବେ ପ୍ରତିକ୍ରିୟା ଦେବ ତାହା ନିଷ୍ପତ୍ତି ନେବା ପାଇଁ ସେନାକୁ ସ୍ୱାଧୀନତା ଦିଆଯାଇଛି। ଏହା ପରେ ଭାରତ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ନିଷ୍ପତ୍ତି ନିଆଯାଇଥିଲା।
ଭାରତ କେଉଁଠାରେ କାର୍ଯ୍ୟାନୁଷ୍ଠାନ ଗ୍ରହଣ କଲା?
ପହଲଗାମ ଆକ୍ରମଣରେ, ଆତଙ୍କବାଦୀମାନେ ପର୍ଯ୍ୟଟକଙ୍କୁ ସେମାନଙ୍କ ଧର୍ମ ପଚାରିବାରୁ ଗୁଳି କରିଥିଲେ। ଆକ୍ରମଣର ୧୫ ଦିନ ପରେ ୬ ମେ ରାତିରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର ମଧ୍ୟରେ ଆତଙ୍କବାଦୀ ଆଡ୍ଡା ଥିବା ସ୍ଥାନଗୁଡ଼ିକରେ ଏହି ଅପରେସନ କରାଯାଇଥିଲା।
ଭାରତ କିପରି ପ୍ରତିକ୍ରିୟା ଦେଇଥିଲା?
ପ୍ରାରମ୍ଭିକ ସୂଚନା ଅନୁଯାୟୀ, ଭାରତୀୟ ସଶସ୍ତ୍ର ବାହିନୀ ଅପରେସନ ସିନ୍ଦୂର ଅଧୀନରେ ପାକିସ୍ତାନ ଏବଂ ପିଓକେ ଭିତରେ କ୍ଷେପଣାସ୍ତ୍ର ଆକ୍ରମଣ କରିଥିଲେ। ଆକ୍ରମଣଗୁଡ଼ିକ ଭଲ ଭାବରେ ଯୋଜନାବଦ୍ଧ ଥିଲା। ମୋଟ ନଅଟି ସ୍ଥାନକୁ ଟାର୍ଗେଟ କରାଯାଇଥିଲା। ଏଥିରେ, ଏହା ଧ୍ୟାନରେ ରଖାଯାଇଥିଲା ଯେ ପାକିସ୍ତାନର କୌଣସି ସାମରିକ ଘାଟି ଏହାର ପରିସରରେ ନ ଆସେ। ଭାରତ ଏହି ମାମଲାରେ ସଂଯମତା ଅବଲମ୍ବନ କରିଥିଲା ଏବଂ କେବଳ ଆତଙ୍କବାଦୀଙ୍କ ଆଡ୍ଡାକୁ ଟାର୍ଗେଟ କରିଥିଲା।
ସେନା ପ୍ରଥମେ ରାତି ୧.୨ ରେ ଏକ ୬୪ ସେକେଣ୍ଡର ଭିଡିଓ ପୋଷ୍ଟ କରିଥିଲା, ଯେଉଁଥିରେ ଲେଖାଥିଲା – “प्रहाराय सन्निहिताः, जयाय प्रशिक्षिताः” ଏହାର ଅର୍ଥ ହେଉଛି ଆକ୍ରମଣ କରିବାକୁ ପ୍ରସ୍ତୁତ ଏବଂ ଜିତିବା ପାଇଁ ପ୍ରଶିକ୍ଷିତ। ଏହା ପରେ, ରାତି ୧:୫୧ ରେ ଦ୍ୱିତୀୟ ପୋଷ୍ଟ ପ୍ରକାଶିତ ହେଲା, ଯେଉଁଥିରେ ଅପରେସନ ସିନ୍ଦୂରର ଫଟୋ ସହିତ ଲେଖାଯାଇଥିଲା – ନ୍ୟାୟ ହୋଇଛି, ଜୟ ହିନ୍ଦ। ଏହା ପରେ, ପ୍ରେସ୍ ଇନଫର୍ମେସନ୍ ବ୍ୟୁରୋ (PIB) ଦ୍ୱାରା ପ୍ରାରମ୍ଭିକ ସୂଚନା ଜାରି କରାଯାଇଥିଲା ଯେ ଏହା ଉପରେ ପରେ ଏକ ବିସ୍ତୃତ ସୂଚନା ଦିଆଯିବ।
ପାକିସ୍ତାନର କେଉଁ ସ୍ଥାନଗୁଡ଼ିକୁ ଟାର୍ଗେଟ କରାଯାଇଥିଲା?
ବାହାବଲପୁର, ମୁରିଡକେ, ସିଆଲକୋଟ, ଭୀମବର, କୋଟଲି ଏବଂ ମୁଜାଫରବାଦରେ ଭାରତ ଆତଙ୍କବାଦୀ ଲୁଚି ରହିଥିବା ସ୍ଥାନକୁ ଟାର୍ଗେଟ କରିଛି। ସୂତ୍ର ଅନୁଯାୟୀ, ଭାରତର କ୍ଷେପଣାସ୍ତ୍ର ବାହାବଲପୁରରେ ଜୈଶ-ଏ-ମହମ୍ମଦର ଆଡ୍ଡା, ମୁଜାଫରାବାଦରେ ସେଣ୍ଟ୍ରାଲ ଗ୍ରୀଡ୍ ସିଷ୍ଟମ ଏବଂ ମୁରିଦକେରେ ହାଫିଜ୍ ସଇଦର ଆଡ୍ଡା ଉପରେ ପଡ଼ିଥିବା ସୂଚନା ମିଳିଛି। ଜୈଶ-ଏ-ମହମ୍ମଦର ମୁଖ୍ୟ ହେଉଛନ୍ତି ସେହି ମାସୁଦ ଆଝାର ଯାହାକୁ ୧୯୯୯ ମସିହାରେ IC-814 କାନ୍ଦାହାର ବିମାନ ଅପହରଣ ମାମଲା ପରେ ମୁକ୍ତ କରିବାକୁ ପଡିଥିଲା। ମାସୁଦ ଆଝାର ପାକିସ୍ତାନ ଫେରିବା ପରେ, ବାହାୱଲପୁର ଆତଙ୍କବାଦୀମାନଙ୍କୁ ତାଲିମ ଦେବା ପାଇଁ ଏକ ପ୍ରମୁଖ ସ୍ଥାନ ପାଲଟିଥିଲା। ଜୈଶ-ଏ-ମହମ୍ମଦ ୨୦୦୧ ମସିହାରେ ସଂସଦ ଉପରେ ଆକ୍ରମଣ, ୨୦୧୬ ପଠାନକୋଟ ଆକ୍ରମଣ ଏବଂ ୨୦୧୯ ପୁଲୱାମା ଆକ୍ରମଣରେ ସାମିଲ ରହିଛି। ଏହି ସମୟରେ, ହାଫିଜ୍ ସଇଦ ଲସ୍କର-ଏ-ତୈବାର ମୁଖ୍ୟ, ଯିଏ ୨୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ। ଲଶ୍କର-ଏ-ତାଇବା ମୁଖ୍ୟାଳୟ ନିଜେ ମୁରିଡକେରେ ଅଛି | ଏହି ଆତଙ୍କବାଦୀ ସଂଗଠନ ୧୯୯୦ ମସିହାରୁ ମୁରିଦକେରୁ କାର୍ଯ୍ୟ କରିଆସୁଛି। ଭାରତ କେବଳ ଲସ୍କର-ଏ-ତୈବା ଏବଂ ଜୈଶ-ଏ-ମହମ୍ମଦର ନେତାମାନଙ୍କୁ ଟାର୍ଗେଟ କରିବା ପାଇଁ ଏହି ସ୍ଥାନଗୁଡ଼ିକୁ ବାଛିଥିଲା। ଯେତେବେଳେ ମୁଜାଫରାବାଦ ଏବଂ କୋଟଲି ନିୟନ୍ତ୍ରଣ ରେଖା ନିକଟରେ ଅବସ୍ଥିତ।
ପାକିସ୍ତାନ କଣ ସ୍ୱୀକାର କଲା?
ଭାରତର କାର୍ଯ୍ୟାନୁଷ୍ଠାନ ପରେ, ପ୍ରଥମ ବିବୃତ୍ତି ପାକିସ୍ତାନର ଇଣ୍ଟର ସର୍ଭିସ୍ ପବ୍ଲିକ ରିଲେସନର ମହାନିର୍ଦ୍ଦେଶକ ଅହମଦ ସରିଫ ଚୌଧୁରୀଙ୍କ ଠାରୁ ଆସିଛି। ଏହି ବିବୃତ୍ତିରେ ଚୌଧରୀ ସ୍ୱୀକାର କରିଛନ୍ତି ଯେ ଭାରତର ବାୟୁସେନା ବାହାବଲପୁରର ଅହମ୍ମଦ ପୂର୍ବ ଅଞ୍ଚଳର ସୁଭାନଉଲ୍ଲାହ ମସଜିଦ, କୋଟଲି ଏବଂ ମୁଜାଫରାବାଦରେ ଆକ୍ରମଣ କରିଥିଲା। ଆମେ ଏହାର ଜବାବ ଦେବୁ ବୋଲି ସେ ଏହି ଉତ୍ତେଜନାମୂଳକ ବକ୍ତବ୍ୟ ମଧ୍ୟ ଦେଇଥିଲେ। ପରେ, ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ପକ୍ଷରୁ ମଧ୍ୟ ଏକ ବିବୃତ୍ତି ଆସିଥିଲା, ଯେଉଁଥିରେ ସେ ସ୍ୱୀକାର କରିଥିଲେ ଯେ ପାକିସ୍ତାନର ପାଞ୍ଚଟି ସ୍ଥାନରେ ଆକ୍ରମଣ କରାଯାଇଛି। ସେହି ସମୟରେ, ପାକିସ୍ତାନ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ସେଠାକାର ଲୋକମାନେ ନିଜେ ସ୍ୱୀକାର କରିଛନ୍ତି ଯେ କ୍ଷେପଣାସ୍ତ୍ର ଆକ୍ରମଣରେ ମାସୁଦ ଆଝାରର ମଦ୍ରାସା ଧ୍ୱଂସ ହୋଇଯାଇଛି।
ଅପରେସନ ସିନ୍ଦୂର ନାମ କାହିଁକି?
୨୨ ଏପ୍ରିଲ ୨୦୨୫ରେ, ଆତଙ୍କବାଦୀମାନେ କାଶ୍ମୀରର ପହଲଗାମର ପର୍ଯ୍ୟଟନ ସ୍ଥଳରେ ଗୁଳି ଚଳାଇଥିଲେ। ଏହି ଆତଙ୍କବାଦୀମାନେ ଲୋକମାନଙ୍କୁ ସେମାନଙ୍କ ଧର୍ମ ବିଷୟରେ ପଚାରିଥିଲେ। ହିନ୍ଦୁ ପୁରୁଷମାନଙ୍କୁ ଅଲଗା କରି ସେମାନଙ୍କ ପରିବାର ସାମ୍ନାରେ ଗୁଳି କରାଯାଇଥିଲା। ଏହି ଆକ୍ରମଣରେ ଅନେକ ମହିଳା ସେମାନଙ୍କ ସ୍ୱାମୀଙ୍କୁ ହରାଇଥିଲେ। ଏହି ମହିଳାଙ୍କ ମଧ୍ୟରୁ କିଛି ମହିଳା କିଛି ଦିନ ପୂର୍ବରୁ ବିବାହିତ ହୋଇଥିଲେ ଏବଂ ସେମାନେ ସେମାନଙ୍କ ସ୍ୱାମୀଙ୍କ କାଶ୍ମୀର ବୁଲିବାକୁ ଯାଇଥିବା ବେଳେ ସେମାନଙ୍କ ଅତି ନୃଶଂସ ଭାବେ ଆତଙ୍କବାଦୀମାନେ ହତ୍ୟା କରିଥିଲେ।