ନୂଆଦିଲ୍ଲୀ,୭ା୨: ଭାରତୀୟ ବୈଜ୍ଞାନିକମାନେ କୋଭିଡ୍ ମହାମାରୀର ସବୁ ଭାରିଆଣ୍ଟକୁ ପ୍ରତିହତ କରିବା ଭଳି ଏକ ଭାକ୍ସିନ ବିକଶିତ କରିଥିବା ଦାବି କରିଛନ୍ତି। ନୂଆ ଟିକାର ନାମ ‘ଅଭିସ୍କୋଭାକ୍’ ରଖାଯାଇଛି। ଏହି ଗବେଷଣାରେ ଭୁବନେଶ୍ୱରସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ସାଇନ୍ସ ଏଜୁକେଶନ ଆଣ୍ଡ ରିସର୍ଚ୍ଚ (ଆଇଆଇଏସ୍ଇଆର୍)ର ବୈଜ୍ଞାନିକମାନେ ସାମିଲ ଅଛନ୍ତି।
ସେମାନଙ୍କ ଗବେଷଣାକୁ ଜର୍ନାଲ ଅଫ୍ ମୋଲେକ୍ୟୁଲାର ଲିକ୍ୱିଡ୍ସରେ ପ୍ରକାଶନ ଲାଗି ଗ୍ରହଣ କରାଯାଇଛି। ସାର୍ସ-କୋଭ୍-୨ ଭାଇରସ୍ର ନୂଆ ଭାରିଆଣ୍ଟଗୁଡ଼ିକ ବିଶ୍ୱବ୍ୟାପୀ ଆତଙ୍କ ସୃଷ୍ଟି କରିଥିବାବେଳେ ପଶ୍ଚିମବଙ୍ଗର ଆସନସୋଲସ୍ଥିତ କାଜି ନଜ୍ରୁଲ ବିଶ୍ୱବିଦ୍ୟାଳୟ ଏବଂ ଭୁବନେଶ୍ୱରସ୍ଥିତ ଆଇଆଇଏସ୍ଇଆର୍ର ବୈଜ୍ଞାନିକମାନେ ଏକ ପେପ୍ଟାଇଡ୍ (ଆମିନୋ ଅମ୍ଳର ଛୋଟ ଶୃଙ୍ଖଳା ସମ୍ବନ୍ଧୀୟ) ଭାକ୍ସିନ ବିକଶିତ କରିଛନ୍ତି। ଏହି ଟିକା ଭବିଷ୍ୟତରେ କୋଭିଡ୍-୧୯ର ସମସ୍ତ ପ୍ରକାର ସମ୍ଭାବ୍ୟ ଭୂତାଣୁରୁ ଲୋକଙ୍କୁ ସୁରକ୍ଷା ଦେବ ବୋଲି ଗବେଷକମାନେ କହିଛନ୍ତି। ସେମାନଙ୍କ ମତରେ ଏହି ଗବେଷଣାରେ ଇମ୍ୟୁନୋଇନ୍ଫର୍ମେଟିକ୍ ଉପାୟ ଆପଣାଯାଇଥିଲା। ଅଭିସ୍କୋଭାକ୍ ଟିକା କରୋନାର ଅଦ୍ୟାବଧି ଦେଖାଦେଇଥିବା ୬ ପ୍ରକାର ଭୂତାଣୁରୁ ସୁରକ୍ଷା ଦେବା ପାଇଁ ସକ୍ଷମ। ସେଗୁଡ଼ିକ ହେଲା ଏଚ୍କୋଭ୍-୨୨୯ଇ, ଏଚ୍କୋଭ୍-ଏଚ୍କେୟୁ୧, ଏଚ୍କୋଭ୍-ଓସି୪୩, ସାର୍ସ-କୋଭ୍, ଏମ୍ଇଆର୍ଏସ୍-କୋଭ୍ ଏବଂ ସାର୍ସ-କୋଭ୍-୨। କାଜି ନଜ୍ରୁଲ ୟୁନିଭର୍ସିଟିର ଅଭିଜ୍ଞାନ ଚୌଧୁରୀ, ପାର୍ଥ ସେନଗୁପ୍ତାଙ୍କ ସହ ଆଇଆଇଏସ୍ଇଆର୍ ଭୁବନେଶ୍ୱରର ସରୋଜ କୁମାର ପଣ୍ଡା ଓ ମଳୟ କୁମାର ରଣାଙ୍କ ମତରେ ଏହି ଟିକା ସ୍ଥିର, ଆଣ୍ଟିଜେନିକ୍ (ପ୍ରତିପିଣ୍ଡଜ) ଏବଂ ଇମ୍ୟୁନୋଜେନିକ୍ (ରୋଗ ପ୍ରତିରୋଧୀ) ଭାବେ କାର୍ଯ୍ୟ କରୁଛି। ଅଭିଜ୍ଞାନ କହିଛନ୍ତି, କମ୍ପ୍ୟୁଟେଶନାଲ ପଦ୍ଧତିରେ ଗବେଷକ ଦଳ ଏହାକୁ ବିକଶିତ କରିଛନ୍ତି। ପରବର୍ତ୍ତୀ ପର୍ଯ୍ୟାୟରେ ଟିକା ଉତ୍ପାଦନ ପରେ ପରୀକ୍ଷଣ କରାଯିବ। ଏହା ଏକ ସ୍ବତନ୍ତ୍ର ଭାକ୍ସିନ। ବିଶ୍ୱର ଅନ୍ୟ କୌଣସି ଟିକା କରୋନା ଭୂତାଣୁର ସବୁ ପ୍ରକାର ଭାରିଆଣ୍ଟ ସହ ଏକକାଳୀନ ଲଢ଼ିବା ଭଳି ପ୍ରଣାଳୀରେ ବିକଶିତ ହୋଇନାହିଁ। ଅଭିସ୍କୋଭାକ୍ ଟିକା ଶରୀରରେ ଟିଏଲ୍ଆର୍୪ ପ୍ରୋଟିନ୍ ସହିତ ସହଜରେ ମିଶ୍ରଣ ହୋଇ ଟିକା ଗ୍ରହୀତାଙ୍କ ରୋଗ ପ୍ରତିଷେଧକ କ୍ଷମତାକୁ ବୃଦ୍ଧି କରିପାରୁଛି ବୋଲି ବୈଜ୍ଞାନିକମାନେ ସୂଚନା ଦେଇଛନ୍ତି।