ଦାରିଙ୍ଗବାଡ଼ି ପର୍ଯ୍ୟଟନ କ୍ଷେତ୍ରରେ ରାଜସ୍ୱର ବିପୁଳ ଅଭିବୃଦ୍ଧି: ୩ ମାସରେ ଆଦାୟ ହେଲା ୧୪ ଲକ୍ଷ ଟଙ୍କା

ଫୁଲବାଣୀ: ଓଡ଼ିଶାର କାଶ୍ମୀର ଭାବେ ପରିଚିତକନ୍ଧମାଳ ଜିଲ୍ଲାର ପର୍ଯ୍ୟଟନ ମାନଚିତ୍ରରେ ସ୍ୱତନ୍ତ୍ର ସ୍ଥାନ ଅଧିକାର କରିଥିବା ଦାରିଙ୍ଗବାଡ଼ି ଅଞ୍ଚଳରୁ ଏବେ ଏକ ବଡ଼ ଖବର ସାମ୍ନାକୁ ଆସିଛି। ଓଡ଼ିଶାର କାଶ୍ମୀର ଭାବେ ପରିଚିତ ଏହି ଅଞ୍ଚଳରେ ପର୍ଯ୍ୟଟନ କ୍ଷେତ୍ରର ସୁପରିଚାଳନା ଯୋଗୁଁ ରାଜସ୍ୱ ସଂଗ୍ରହ କ୍ଷେତ୍ରରେ ଏକ ଅପୂର୍ବ ସଫଳତା ହାସଲ ହୋଇଛି। ଦାରିଙ୍ଗବାଡ଼ି ବ୍ଲକ ପ୍ରଶାସନ ଏବଂ ସାଞ୍ଜାସରୁ ଉନ୍ନୟନ ଟ୍ରଷ୍ଟର ମିଳିତ ପ୍ରଚେଷ୍ଟାରେ ମାତ୍ର ତିନି ମାସ ମଧ୍ୟରେ କଫି ବଗିଚା ଏବଂ ହିଲ୍ ଭିୟୁ ପାର୍କରୁ ଟିକେଟ୍ ବିକ୍ରି ବାବଦକୁ ପାଖାପାଖି ୧୪ ଲକ୍ଷ ଟଙ୍କା ସଂଗ୍ରହ କରାଯାଇଛି। ଏହି ବିପୁଳ ପରିମାଣର ଅର୍ଥ ସଂଗ୍ରହ ବିଗତ ବର୍ଷଗୁଡ଼ିକର ସମସ୍ତ ରେକର୍ଡକୁ ଭାଙ୍ଗି ଦେଇଛି, ଯାହା ପ୍ରଶାସନିକ ସ୍ତରରେ ହୋଇଥିବା ବଡ଼ ପରିବର୍ତ୍ତନର ସଙ୍କେତ ଦେଉଛି।

କନ୍ଧମାଳ ଜିଲ୍ଲାପାଳ ବେଦ ଭୂଷଣ ଏବଂ ବାଲିଗୁଡ଼ା ଉପ-ଜିଲ୍ଲାପାଳ ତଥା ସାଞ୍ଜାସରୁ ଉନ୍ନୟନ ଟ୍ରଷ୍ଟର ଅଧ୍ୟକ୍ଷା ପ୍ରଣୀତା ଦାସଙ୍କ ଦୂରଦୃଷ୍ଟିସମ୍ପନ୍ନ ପରାମର୍ଶ ଏବଂ ଦାରିଙ୍ଗବାଡ଼ି ବ୍ଲକ ବିଡ଼ିଓ ପ୍ରୀତିରଞ୍ଜନ ରଥଙ୍କ ନିରନ୍ତର ଉଦ୍ୟମ ଯୋଗୁଁ ଏହି ବମ୍ପର ଆୟ ସମ୍ଭବ ହୋଇପାରିଛି। ପୂର୍ବରୁ ହିଲ୍ ଭିୟୁ ପାର୍କ କେବଳ ସାଞ୍ଜାସରୁ ଉନ୍ନୟନ ଟ୍ରଷ୍ଟର ପ୍ରତ୍ୟକ୍ଷ ତତ୍ତ୍ୱାବଧାନରେ ରହିଥିବା ବେଳେ ଏବେ ବ୍ଲକ ପ୍ରଶାସନ କଫି ବଗିଚାକୁ ମଧ୍ୟ ଏହି ଟ୍ରଷ୍ଟ ଅଧୀନରେ ସାମିଲ କରି ଏକ ନୂତନ ପରିଚାଳନା ବ୍ୟବସ୍ଥା ଆରମ୍ଭ କରିଛି। ଏହି ବ୍ୟବସ୍ଥା ଲାଗୁ ହେବା ପରେ ରାଜସ୍ୱ ଆଦାୟରେ ସ୍ୱଚ୍ଛତା ଆସିଛି ଏବଂ ପର୍ଯ୍ୟଟନ ସ୍ଥଳୀଗୁଡ଼ିକର ଶୃଙ୍ଖଳିତ ପରିଚାଳନା ସୁନିଶ୍ଚିତ ହୋଇଛି। ଗତ ୨୦୨୫ ମସିହା ନଭେମ୍ବର ମାସରୁ ଚଳିତ ବର୍ଷ ଜାନୁୟାରୀ ମାସ ପର୍ଯ୍ୟନ୍ତ କେବଳ ହିଲ୍ ଭିୟୁ ପାର୍କରୁ ୭ ଲକ୍ଷ ୧୨ ହଜାର ୯୦ ଟଙ୍କା ଆଦାୟ ହୋଇଥିବା ବେଳେ କଫି ବଗିଚାରୁ ୬ ଲକ୍ଷ ୮୯ ହଜାର ୯୬୦ ଟଙ୍କା ସଂଗ୍ରହ ହୋଇଥିବା ନେଇ ସରକାରୀ ଭାବେ ସୂଚନା ମିଳିଛି।

ଦାରିଙ୍ଗବାଡ଼ିର ଏହି ଦୁଇ ପ୍ରମୁଖ ପର୍ଯ୍ୟଟନ କେନ୍ଦ୍ରର ସୌନ୍ଦର୍ଯ୍ୟକରଣ ଏବଂ ଉନ୍ନତିମୂଳକ କାର୍ଯ୍ୟକୁ ଦେଖି ରାଜ୍ୟର ମୁଖ୍ୟ ଶାସନ ସଚିବ ଅନୁ ଗର୍ଗ ଏବଂ ବିଧାନସଭା ବାଚସ୍ପତି ସୁରମା ପାଢ଼ୀ ମଧ୍ୟ ବ୍ଲକ ପ୍ରଶାସନର ଏହି ଅଭିନବ ପ୍ରୟାସକୁ ସାଧୁବାଦ ଜଣାଇଛନ୍ତି। ବର୍ତ୍ତମାନ ହିଲ୍ ଭିୟୁ ପାର୍କରେ ମ୍ୟୁଜିକାଲ୍ ଫାଉଣ୍ଟେନ୍ ଏବଂ ଏକ ନବନିର୍ମିତ ସୁଉଚ୍ଚ ୱାଚ୍ ଟାୱାର ପର୍ଯ୍ୟଟକଙ୍କୁ ବିଶେଷ ଭାବେ ଆକୃଷ୍ଟ କରୁଛି। ରାଜ୍ୟ ତଥା ରାଜ୍ୟ ବାହାରୁ ପ୍ରତିଦିନ ହଜାର ହଜାର ସଂଖ୍ୟାରେ ପର୍ଯ୍ୟଟକ ଏଠାକୁ ଆସି କଫି ବଗିଚାର ମନୋରମ ପରିବେଶ ଓ ପାର୍କର ଶୀତଳତାକୁ ଉପଭୋଗ କରୁଛନ୍ତି। ପୂର୍ବରୁ କଫି ବଗିଚା ମୃତ୍ତିକା ସଂରକ୍ଷଣ ବିଭାଗ ଅଧୀନରେ ରହିଥିଲେ ମଧ୍ୟ ସେଠାରୁ ଆଦାୟ ହେଉଥିବା ଟିକେଟ୍ ଅର୍ଥର କୌଣସି ସଠିକ୍ ଆୟ-ବ୍ୟୟ ହିସାବ ସାଧାରଣରେ ମିଳୁନଥିଲା। ଏପରିକି ପୂର୍ବରୁ କିଛି ଅସାଧୁ କର୍ମଚାରୀ କଫି ଓ ଗୋଲମରିଚକୁ କମ୍ ଦରରେ ବିକ୍ରି କରି ବ୍ୟକ୍ତିଗତ ମୁନାଫା ହାସଲ କରୁଥିବା ଏବଂ ସରକାରୀ ଅର୍ଥ ହଡ଼ପ କରୁଥିବା ନେଇ ଅଭିଯୋଗ ହେଉଥିଲା।

ମାତ୍ର ବର୍ତ୍ତମାନ ବ୍ଲକ ପ୍ରଶାସନ କଫି ବଗିଚା ନିଜ ହାତକୁ ନେବା ପରେ ଏହାର ପୂର୍ଣ୍ଣ ସୌନ୍ଦର୍ଯ୍ୟକରଣ କରାଯିବା ସହ ସମସ୍ତ କାରବାରକୁ ବୈଧାନିକ ଓ ସ୍ୱଚ୍ଛ କରାଯାଇଛି। ଏହି ସଫଳତା ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳାଇ ଦେଇଥିବା ବେଳେ ଅନ୍ୟପଟେ କିଛି ପ୍ରଶ୍ନ ମଧ୍ୟ ସୃଷ୍ଟି କରିଛି। ଦାରିଙ୍ଗବାଡ଼ିର ଅନ୍ୟାନ୍ୟ ପର୍ଯ୍ୟଟନ ସ୍ଥଳୀଗୁଡ଼ିକରୁ କେତେ ଟଙ୍କା ଆଦାୟ ହେଉଛି ଏବଂ ସେଗୁଡ଼ିକର ପରିଚାଳନା କିପରି ଚାଲିଛି, ସେ ନେଇ ପରିଚାଳନା କମିଟି ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ପ୍ରଦାନ କରିନାହିଁ। ଦାରିଙ୍ଗବାଡ଼ିବାସୀ ଦାବି କରିଛନ୍ତି ଯେ ଯଦି ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପର୍ଯ୍ୟଟନ ସ୍ଥଳୀର ଆୟର ସତ୍ୟାସତ୍ୟ ଯାଞ୍ଚ କରାଯାଏ, ତେବେ ପର୍ଯ୍ୟଟନ କ୍ଷେତ୍ରରୁ ମିଳୁଥିବା ପ୍ରକୃତ ରାଜସ୍ୱର ଚିତ୍ର ପଦାକୁ ଆସିପାରିବ। ଆଗାମୀ ଦିନରେ ଏହି ରାଜସ୍ୱ ଅର୍ଥକୁ ପର୍ଯ୍ୟଟନ କେନ୍ଦ୍ରଗୁଡ଼ିକର ଅଧିକ ବିକାଶ ପାଇଁ ବିନିଯୋଗ କରିବାକୁ ପ୍ରଶାସନ ଲକ୍ଷ୍ୟ ରଖିଛି, ଯାହା ଦାରିଙ୍ଗବାଡ଼ିକୁ ଏକ ଆନ୍ତର୍ଜାତୀୟ ସ୍ତରର ପର୍ଯ୍ୟଟନ ହବ୍ ଭାବେ ଗଢ଼ିତୋଳିବାରେ ସହାୟକ ହେବ।