ଭୁବନେଶ୍ବର, ୧୯ା୧୧(ବ୍ୟୁରୋ): ଭୁବନେଶ୍ବର ଓ ଏହାର ଆଖପାଖ ଅଞ୍ଚଳର ଜନସାଧାରଣଙ୍କୁ ଗୁଣାତ୍ମକ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ରାଜ୍ୟ ସରକାର ଭୁବନେଶ୍ବରରେ କ୍ୟାପିଟାଲ ହସ୍ପିଟାଲ ଏବଂ ପିଜି ପାଠ୍ୟକ୍ରମ ପାଇଁ ପିଜିଆଇଏମଇଆର ପ୍ରତିଷ୍ଠା କରିଛନ୍ତି। ୨୦୨୨-୨୩ ବର୍ଷ ପାଇଁ ବର୍ତ୍ତମାନ ସୁଦ୍ଧା ୬ଟି କ୍ଲିନିକାଲ ପାଠ୍ୟକ୍ରମ ଯଥା-ସର୍ଜରୀ, ମେଡିସନ୍, ଅର୍ଥୋପେଡିକ୍, ଗାଇନେକୋଲୋଜି, ରେସ୍ପିରେଟୋରୀ ମେଡିସନ୍ ଏବଂ ପେଡିଆଟ୍ରିକ୍ସ ଆଦିରେ ୨୪ଟି ସିଟ୍କୁ ନ୍ୟାସନାଲ ମେଡିକାଲ କାଉନସିଲ ଅନୁମୋଦନ କରିଛନ୍ତି। ସ୍ବାସ୍ଥ୍ୟ ବିଭାଗର ସଚିବ ଶାଳିନୀ ପଣ୍ଡିତଙ୍କ ସୂଚନା ଅନୁସାରେ, ବର୍ତ୍ତମାନ ଏହି ପାଠ୍ୟକ୍ରମଗୁଡ଼ିକରେ ନାମଲେଖା ଜାରି ରହିଛି। ୧୧ଟି କ୍ଲିନିକାଲ ଏବଂ ୪ଟି ପାରା-କ୍ଲିନିକାଲ ପାଠ୍ୟକ୍ରମରେ ପିଜି ପାଠପଢ଼ା ପାଇଁ ଏହି ଅନୁଷ୍ଠାନକୁ ବିକଶିତ କରାଯାଉଛି। ଏନଏମସି ମାର୍ଗଦର୍ଶିକା ଅନୁସାରେ ମେଡିକାଲ କଲେଜ ଏବଂ ହସ୍ପିଟାଲର ଓପିଡି ସମୟ ଧାର୍ଯ୍ୟ ହୋଇଛି। ସକାଳ ୯ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଓପିଡି ସେବା ମିଳିବ। ମଧ୍ୟାହ୍ନ ୧ଟାରୁ ୨ଟା ପର୍ଯ୍ୟନ୍ତ ମଧ୍ୟାହ୍ନ ଭୋଜନ ସମୟ ରଖାଯାଇଛି। ରାଜ୍ୟର ସମସ୍ତ ମେଡିକାଲ କଲେଜ ଏବଂ ହସ୍ପିଟାଲରେ ଏହି ସମୟକୁ ଅନୁପାଳନ କରାଯିବ। ନିୟମିତ ଓପିଡି ସମୟ ବାଦ୍ ଅପରାହ୍ନ ୫ଟାରୁ ସକାଳ ୯ଟା ପର୍ଯ୍ୟନ୍ତ ଜରୁରୀକାଳୀନ ସେବା ମିଳିବ।