ସୁବର୍ଣ୍ଣପୁର : ସୁବର୍ଣ୍ଣପୁର ଜିଲ୍ଲା ଗଜବନ୍ଧ ପଞ୍ଚାୟତର ବର୍ତ୍ତମାନ ସରପଞ୍ଚଙ୍କ ସ୍ବାମୀ ବଲ୍ଲଭ କ୍ଷେତ୍ରୀଙ୍କ ହତ୍ୟାକାଣ୍ଡକୁ ନେଇ ପୋଲିସ ପର୍ଦ୍ଦାଫାଶ କରିଛି । ଜମି ବିବାଦରୁ ଘଟିଥିବା ଏହି ହତ୍ୟାକାଣ୍ଡରେ ସଂପୃକ୍ତ ୪ ଅଭିଯୁକ୍ତଙ୍କୁ ଗିରଫ କରାଯାଇଛି ବୋଲି ଆରକ୍ଷୀ ଅଧୀକ୍ଷକ ନାରାୟଣ ନାୟକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।
ଗତ ୧୦ ତାରିଖ ରାତିରେ ବଲ୍ଲଭ କ୍ଷେତ୍ରୀଙ୍କୁ ରାମପୁର ଥାନା ଅନ୍ତର୍ଗତ ପଣ୍ଡରାପାଲି ରାସ୍ତାରେ ନିର୍ମମ ଭାବେ ହତ୍ୟା କରାଯାଇଥିଲା । ପରିବାର ଲୋକଙ୍କ ଅଭିଯୋଗ ଅନୁସାରେ, ରାମପୁର ଥାନାରେ ୯୮/୨୦୨୫ ନମ୍ବରରେ ମାମଲା ରୁଜୁ ହୋଇଥିଲା । ଘଟଣା ସ୍ଥଳରେ ସାଇଣ୍ଟିଫିକ୍ ଟିମ ଯାଇ ଛାନ୍ବିନ ଆରମ୍ଭ କରାଯାଇଥିଲା ।
ପୋଲିସ ତଦନ୍ତରେ ଜଣାପଡ଼ିଛି ଯେ, ଏହି ହତ୍ୟା ପଛରେ ପୁରୁଣା ଜମି ବିବାଦ ଥିଲା । ଗିରଫ ହୋଇଥିବା ଅଭିଯୁକ୍ତମାନେ ହେଲେ ବ୍ରାହ୍ମଣୀପାଲି ଗାଁର ଯୋଗେଶ୍ୱର ଭୋଇ, ପଣ୍ଡରାପାଲି ଗାଁର ଗୋବିନ୍ଦ ବେହେରା, ଗଜବନ୍ଧ ଗାଁର ଧନଞ୍ଜୟ ପଶାୟତ ଓ ହୃଶୀକେଶ ବଗର୍ତ୍ତୀ । ଚାରିଜଣଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ବୋଲି ରାମପୁର ପୋଲିସ ସୂଚନା ଦେଇଛି।
ଏହି ଘଟଣା ସହିତ ଅଞ୍ଚଳରେ ପୁଣିଥରେ ଜମି ବିବାଦ ଓ ଅପରାଧିକ କାର୍ଯ୍ୟକଳାପ ଉପରେ ଚିନ୍ତା ଓ ଚର୍ଚ୍ଚା ଆରମ୍ଭ ହୋଇଛି।
ରିପୋର୍ଟ: ଶୁଭସ୍ମିତା ପ୍ରଧାନ