ସୁଇଜରଲାଣ୍ଡ,୮।୧୨: ‘ସୁଇସାଇଡ୍ ମେସିନ’ ବ୍ୟବହାରକୁ ୟୁରୋପୀୟ ଦେଶ ସୁଇଜରଲାଣ୍ଡ ସରକାର ଆଇନଗତ ଅନୁମୋଦନ ଦେଇଛନ୍ତି। ଏହାକୁ ପ୍ରସ୍ତୁତ କରିଥିବା କମ୍ପାନୀ ଦାବି କରିଛି ଯେ, ଏହି ମେସିନ ଛୁଇଁରେ ଯେକୌଣସି ବ୍ୟକ୍ତି ୧ ମିନିଟ ମଧ୍ୟରେ ବିନା କୌଣସି ଯନ୍ତ୍ରଣାରେ ମୃତ୍ୟୁବରଣ କରିବେ।
ଏହି ଆତ୍ମହତ୍ୟା ସହାୟତା ଯନ୍ତ୍ର ନାଁ ରହିଛି ‘ସାର୍କୋ କ୍ୟାପସୁଲ’। ସାର୍କୋ ହେଉଛି ଏକ ଥ୍ରୀଡି ମୁଦ୍ରିତ କ୍ୟାପସୁଲ। ଅଷ୍ଟ୍ରେଲିଆରେ ଅବସ୍ଥିତ ଏକ ଅଣ-ଲାଭକାରୀ ସଂସ୍ଥା ଏକଜିଟ ଇଣ୍ଟରନ୍ୟାସନାଲ ଦ୍ୱାରା ଏହାକୁ ବିକଶିତ କରାଯାଇଛି। ସ୍ବିସ୍ଇଫୋ ଦ୍ୱାରା ପ୍ରକାଶିତ ଏକ ରିପୋର୍ଟ ଅନୁଯାୟୀ, ସାର୍କୋ କ୍ୟାପସୁଲ ଭିତରେ ବସିଥିବା ଜଣେ ବ୍ୟକ୍ତିଙ୍କୁ ସକ୍ରିୟ କରିପାରିବ ଏବଂ ଏହାକୁ ସହଜରେ ଯେକୌଣସି ସ୍ଥାନକୁ ନିଆଯାଇପାରିବ। ଏକଜିଟ ଇଣ୍ଟରନ୍ୟାସନାଲର ପ୍ରତିଷ୍ଠାତା ଡକ୍ଟର ଫିଲିପ ନିଚେକ ଏହାକୁ ପ୍ରସ୍ତୁତ କରିଛନ୍ତି। ସ୍ବିସ୍ଇଫୋକୁ ଦେଇଥିବା ଏକ ସାକ୍ଷାତକାରରେ କହିଛନ୍ତି, ପୋଡଟି କଫିନ ପରି ଆରାମଦାୟକ ହେବା ଭଳି ଡିଜାଇନ କରାଯାଇଛି। ବ୍ୟକ୍ତି ଜଣକ କ୍ୟାପସୁଲ ଭିତରେ ଶୋଇଥିବେ ଏବଂ ତାଙ୍କୁ କିଛି ପ୍ରଶ୍ନ ପଚରାଯିବ। ପ୍ରକ୍ରିୟା ବଟନ ଦବାଇବା ପାଇଁ ସମୟ ଦିଆଯିବ।
ଏହି ଆତ୍ମହତ୍ୟା ପୋଡ ଚକିତ ଏବଂ ଭୟାନକ ହୋଇପାରେ, କିନ୍ତୁ ସ୍ବିଜରଲ୍ୟାଣ୍ଡରେ ଆତ୍ମହତ୍ୟା ଆଇନଗତ ଅଟେ। ଏହି ପଦ୍ଧତି ମାଧ୍ୟମରେ ପ୍ରାୟ ୧୩୦୦ ଲୋକଙ୍କର ମତ୍ୟୁ ଘଟିଛି। ଏହି ବ୍ୟକ୍ତି ମାନଙ୍କୁ ତରଳ ସୋଡିୟମ ପେଣ୍ଟୋବାର୍ବିଟାଲ ଇଞ୍ଜେକ୍ସନ ଦିଆଯାଇଥିଲା। ଏହି କାରଣରୁ ବ୍ୟକ୍ତି ଦୁଇରୁ ପାଞ୍ଚ ମିନିଟରେ ଶୋଇପଡେ। ତା’ପରେ ସେ ଏକ ଗଭୀର କୋମାରେ ପଡ଼ି ମୃତ୍ୟୁବରଣ କରନ୍ତି।
‘ସାର୍କୋ କ୍ୟାପସୁଲ’ ପ୍ରକ୍ରିୟାରେ, ବଟନ ଦବାଇବା ପରେ କ୍ୟାପସୁଲ ନାଇଟ୍ରୋଜେନରେ ଭରିଯିବ। ଏହା ୩୦ ସେକେଣ୍ଡରେ ଅମ୍ଳଜାନ ସ୍ତରକୁ ୨୧ ପ୍ରତିଶତରୁ ୧ ପ୍ରତିଶତକୁ ହ୍ରାସ କରିବ ଏବଂ ତା’ପରେ ବ୍ୟକ୍ତି ଅଳ୍ପ ସମୟ ମଧ୍ୟରେ ମୃତ୍ୟୁବରଣ କରିବେ। ଫିଲିପ କହିଛନ୍ତି, ବ୍ୟକ୍ତି ଜଣକ ଟିକେ ବିବ୍ରତ ଅନୁଭବ କରିବେ ଏବଂ ଚେତନା ହରାଇବା ପୂର୍ବରୁ ଟିକେ ଆନନ୍ଦ ଅନୁଭବ କରିବେ। ଚେତନା ହରାଇବାର ୫-୧୦ ମିନିଟ ପରେ ମୃତ୍ୟୁ ଘଟିବ। ଭିତରେ ପଡ଼ିଥିବା ବ୍ୟକ୍ତି ଏହି ସମଗ୍ର ପ୍ରକ୍ରିୟା ସମୟରେ କୌଣସି ଭୟ କିମ୍ବା ଶ୍ୱାସରୁଦ୍ଧ ଅନୁଭବ କରିବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।