ଭୁବନେଶ୍ୱର,୨ା୧ ଚନ୍ଦ୍ରଶେଖରପୁର ସ୍ଥିତ ଡମଣା ହାଟ ବସ୍ତିର ୧୭ତମ ବାର୍ଷିକ ଉତ୍ସବ ଅନୁଷ୍ଠିତ ହୋଇଯାଇଛି । ଏହି ଉତ୍ସବରେ ମୁଖ୍ୟ ଅତିଥି ଭାବେ ଉତ୍ତର ବିଧାୟକ ସୁଶାନ୍ତ କୁମାର ରାଉତ ଯୋଗଦେଇ କହିଥିଲେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ବସ୍ତି ବାସିନ୍ଦାଙ୍କ ଉନ୍ନତି ପାଇଁ କାର୍ଯ୍ୟ କରି ଆସୁଛନ୍ତି । ସେମାନଙ୍କ ମୁହଁରେ ହସ ଫୁଟାଇବା ପାଇଁ ବିଭିନ୍ନ ଯୋଜନା ମାଧ୍ୟମରେ ସମସ୍ତ ପ୍ରକାର ସୁବିଧା ସୁଯୋଗ ଯୋଗାଇ ଦେଇଛନ୍ତି । ନିକଟରେ ଜାଗା ମିଶନ ଜରିଆରେ ଡ୍ରୋନ୍ ସର୍ଭେ ସରିଛି । ଉଷା ସର୍ଭେ ପରେ ସମସ୍ତଙ୍କୁ ଜାଗା ଅଧିକାର ପଟ୍ଟା ମିଳିବ । ଆପଣମାନେ ୨୦୨୪ ରେ ହେବାକୁ ଥିବା ନିର୍ବାଚନରେ ପୁଣି ଥରେ ମୁଖ୍ୟମନ୍ତ୍ରୀଙ୍କୁ ଆଶୀର୍ବାଦ କରି ସେବା କରିବାର ସୁଯୋଗ ଦିଅନ୍ତୁ । ଯେମିତି ଆମ୍ଭମାନଙ୍କର ପ୍ରିୟ ମୁଖ୍ୟମନ୍ତ୍ରୀ ପଞ୍ଚମ ଥର ପାଇଁ ମୁଖ୍ୟମନ୍ତ୍ରୀ ହୋଇ ଓଡିଶାକୁ ଆହୁରି ଆଗକୁ ନେବେ । ସମ୍ମାନିତ ଅତିଥି ଭାବେ ୧୪ ନମ୍ବର ଓାର୍ଡ କର୍ପୋରେଟର ମୋନାଲିସା ସାହୁ, ୮ ନମ୍ବର ଓାର୍ଡ କର୍ପୋରେଟର ଲାଲ ମୋହନ ଟୁଡୁ, ବିଜେଡି ଜିଲ୍ଲା ସମ୍ପାଦକ ମନୋଜ ସାହୁ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ନୟାଗଡ ସିଂହପଡାର କଳାକାର ମାନଙ୍କ ଦ୍ୱରା ରାମଲୀଳା ଅନୁଷ୍ଠିତ ହୋଇଥିଲା । ବସ୍ତିର ସଭାପତି ନବକିଶୋର ସାହୁ, ସମ୍ପାଦକ ପ୍ରଦୀପ କିଶୋର ପରିଡା କାର୍ଯ୍ୟକ୍ରମକୁ ପରିଚାଳନା କରିଥିଲା ବେଳେ ସମସ୍ତ ବସ୍ତି ବାସିନ୍ଦା ସହଯୋଗ କରିଥିଲେ । ସମସ୍ତଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଥିଲା ।