ଭୁବନେଶ୍ୱର,୨୨।୪(ବ୍ୟୁରୋ): ରାଜଧାନୀରେ ୪ବର୍ଷର ଶିଶୁକନ୍ୟାଙ୍କୁ ଅପହରଣ ପରେ ବିକ୍ରି ଉଦ୍ୟମ ହୋଇଛି। ଘଟଣାର ୪ ଦିନ ପରେ ଇନ୍ଫୋସିଟି ଥାନା ପୋଲିସ ବୁଧବାର ସନ୍ଧ୍ୟାରେ ଶିଶୁକନ୍ୟାଙ୍କୁ ଉଦ୍ଧାର କରିବା ସହ ଅପହର୍ତ୍ତାଙ୍କୁ ଗିରଫ କରିଛି। ସେ ହେଲେ ଜଟଣୀ ଥାନା ଅନ୍ତର୍ଗତ କୁଦିଆରୀ ମେଲଣ ପଡିଆ ସାହିର ଅଶୋକ କୁମାର ଦାଶ (୪୧)। ଉଦ୍ଧାର ଶିଶୁକନ୍ୟାଙ୍କୁ ପୋଲିସ ଡାକ୍ତରୀ ପରୀକ୍ଷା କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ପୋଲିସ ଆଇପିସି ଦଫା ୩୬୩, ୩୬୫, ୩୬୭ରେ ମାମଲା (ନଂ.୯୯/୨୦୨୨) ରୁଜୁ କରି ଗୁରୁବାର ଅଭିଯୁକ୍ତ ଅଶୋକଙ୍କୁ କୋର୍ଟ ଚାଲାଣ କରିଥିଲା। ଜାମିନ୍ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତରୁ ପଠାଇ ଦିଆଯାଇଛି। ଅଭିଯୁକ୍ତ ଅଶୋକ ତାଙ୍କୁ ଖାଇବା ପିଇବାରେ ଅବହେଳା କରିବା ସହ ନିର୍ଯାତନା ଦେଉଥିଲେ। ଶିଶୁକନ୍ୟାଙ୍କୁ ବିକ୍ରି ଉଦ୍ଦେଶ୍ୟରେ ଅଶୋକ ଅପହରଣ କରିଥାଇପାରନ୍ତି ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏନେଇ ଭୁବନେଶ୍ୱର ଡିସିପି ଉମାଶଙ୍କର ଦାଶ କହିଛନ୍ତି, ଅଭିଯୁକ୍ତ ଅପହରଣ ନେଇ କୌଣସି ସ୍ପଷ୍ଟ ଉତ୍ତର ଦେଇନାହାନ୍ତି। ‘ପ୍ରାରମ୍ଭ ସେଲ୍’ ପକ୍ଷରୁ ଶିଶୁକନ୍ୟାଙ୍କର ମାନସିକ ସ୍ଥିତି ଯାଞ୍ଚ କରାଯାଇଛି। ଶିଶୁକନ୍ୟା ଜଣକ ସୁସ୍ଥ ଅଛନ୍ତି। ଅଭିଯୁକ୍ତଙ୍କ ବ୍ୟବହାର ଓ କଥାବାର୍ତ୍ତା ସନ୍ଦେହଜନକ ଲାଗୁଛି। ଏନେଇ ଅଧିକ ତଦନ୍ତ ଚାଲିଛି ବୋଲି ସେ କହିଛନ୍ତି।
ସୂଚନା ଅନୁଯାୟୀ, ଶିଶୁକନ୍ୟାଙ୍କ ଘର ଇନ୍ଫୋସିଟି ଥାନା ଅନ୍ତର୍ଗତ ଜଳିମୁଣ୍ଡ ସାହିରେ। ଅଭିଯୁକ୍ତ ଅଶୋକ ନିଜ ମା’ଙ୍କ ସହ ପୁରୁଣା ଭୁବନେଶ୍ୱର ଅଞ୍ଚଳରେ ରହି ରଙ୍ଗକାମ କରନ୍ତି। ଗତ ଶନିବାର ଅପରାହ୍ନ ୧ଟା ୩୦ରେ ଶିଶୁକନ୍ୟାଙ୍କୁ ଅଶୋକ ବିସ୍କୁଟ ଦେଇ ଅପହରଣ କରି ନେଇଥିଲେ। ତେବେ ଶିଶୁକନ୍ୟାଙ୍କୁ ନ ପାଇ ପରିବାର ଲୋକେ ରାତିରେ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ସିସିଟିଭିରେ ଶିଶୁକନ୍ୟା ସହ ଅଭିଯୁକ୍ତ ଅଶୋକଙ୍କୁ ଠାବ କରିବା ପରେ ଧରିବାକୁ ଉଦ୍ୟମ ଆରମ୍ଭ କରିଥିଲେ। ଶିଶୁକନ୍ୟାଙ୍କୁ ଅଶୋକ ଭୁବନେଶ୍ୱରର ଏଣେତେଣେ ବୁଲାଇଥିଲେ। କେତେବେଳେ ସ୍କୁଲ୍ ବାରଣ୍ଡା ତ ଆଉ କେତେବେଳେ ମନ୍ଦିର ବେଢ଼ାରେ ଶିଶୁକନ୍ୟାଙ୍କୁ ଧରି ରହୁଥିଲେ। ଶିଶୁକନ୍ୟା କାନ୍ଦିଲେ ତାଙ୍କୁ ମାଡ଼ ମାରୁଥିଲେ। ତେବେ ବୁଧବାର ସାରେ ଚନ୍ଦ୍ରଶେଖରପୁର କଲ୍ୟାଣମଣ୍ଡପ ସାହି ନିକଟରେ ଶିଶୁକନ୍ୟାଙ୍କୁ ଅଶୋକ ଧରି ବୁଲାବୁଲି କରୁଥିବା ଖବର ପୋଲିସ ସେଠାରେ ଚଢ଼ାଉ କରି ତାଙ୍କୁ କାବୁ କରିବା ସହ ଶିଶୁକନ୍ୟାକୁ ଉଦ୍ଧାର କରିଥିଲା।