ଭୁବନେଶ୍ୱର,୨୨ା୧୧(ବ୍ୟୁରୋ): ରାଜଧାନୀ ଓ ଉପକଣ୍ଠ ଅଞ୍ଚଳରେ ବାଇକ୍ ଚୋରି କରୁଥିବା ଏକ ଗ୍ୟାଙ୍ଗକୁ କମିଶନରେଟ ପୋଲିସ କାବୁ କରିଛି। ଗ୍ୟାଙ୍ଗର ୫ ଜଣ ସଦସ୍ୟଙ୍କୁ ଖଣ୍ଡଗିରି ଥାନା ପୋଲିସ ଗିରଫ କରି ସୋମବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ଖୋର୍ଦ୍ଦା ଜିଲା ସଦର ଥାନା ଗୁରୁଜଙ୍ଗରେ ରହୁଥିବା ପ୍ରଶାନ୍ତ ଲେଙ୍କା(୨୬), ରମେଶ ନାୟକ(୨୮), ଜଟଣୀ ଥାନା କୁସୁମାଟି ଗ୍ରାମର ଦୀପକ ନାୟକ(୨୬), କଟକ ଜିଲା ଆଠଗଡ଼ ଇଚ୍ଛାପୁର ଗ୍ରାମର ଦୁଷ୍ମନ୍ତ ବେହେରା(୨୮), ବାଙ୍କି ଥାନା ମଣିପୁର ଗ୍ରାମର ବିଜୁ ନାୟକ(୨୨)। ପୋଲିସ ତାଙ୍କଠାରୁ ୩୪ଟି ବାଇକ୍ ଜବତ କରିଛି। ଅଭିଯୁକ୍ତମାନଙ୍କୁ ସୋମବାର କୋର୍ଟ ଚାଲାଣ କରାଯାଇଥିଲା। ଜାମିନ୍ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ଗ୍ୟାଙ୍ଗରେ ଆଉ କିଛି ସଦସ୍ୟ ଥିବା ପୋଲିସ ଜାଣିବାକୁ ପାଇଛି। ସେମାନଙ୍କୁ ଧରିବାକୁ ପୋଲିସ ଖୋଳତାଡ଼ ଜାରି ରଖିଛି। ତେବେ ଏହି ମାମଲାରେ ଅଧିକ ସୁରାଗ ପାଇବା ପାଇଁ ଅଭିଯୁକ୍ତମାନଙ୍କୁ ପୋଲିସ ରିମାଣ୍ଡରେ ଆଣିବାକୁ ଯୋଜନା କରୁଛି। ଅନ୍ୟପକ୍ଷରେ ଜବତ ହୋଇଥିବା ୩୪ଟି ବାଇକରୁ ୯ଟିକୁ ପ୍ରକୃତ ମାଲିକକୁ ପୋଲିସ ହସ୍ତାନର କରିଛି।
ସୂଚନା ଅନୁଯାୟୀ, ଅଭିଯୁକ୍ତମାନେ ଏକ ଗ୍ୟାଙ୍ଗ ଗଢି ରାଜଧାନୀ ଓ ଏହାର ଆଖପାଖ ଅଞ୍ଚଳରୁ ବାଇକ୍ ଚୋରି କରୁଥିଲେ। ବିଶେଷ କରି ପାର୍କ, ହସ୍ପିଟାଲ, କୋର୍ଟ ଭଳି ଜନଗହଳିପୂର୍ଣ୍ଣ ସ୍ଥାନରୁ ବାଇକ୍ ଚୋରି କରୁଥିଲେ। ପାର୍କିଙ୍ଗ ସ୍ଥାନରୁ ମାଷ୍ଟର କି ସାହାଯ୍ୟରେ ବାଇକ୍କୁ ଖୋଲି ନେଇଯାଉଥିଲେ। ଏହି ଚୋରି ବାଇକଗୁଡିକୁ ସେମାନେ ଆଠଗଡ. ନୟାଗଡ, ବଡମ୍ବା ଓ ଢେଙ୍କାନାଳ ଆଦି ଅଞ୍ଚଳରେ ଅତି ସ୍ବଳ୍ପ ମୂଲ୍ୟରେ ବିକ୍ରି କରି ଦେଉଥିଲେ। ପୋଲିସ ଏକ ମାମଲା (ନଂ. ୫୪୫/୨୧) ରୁଜୁ କରି ଅଧିକ ତଦନ୍ତ କରୁଛି।