ନୂଆଦିଲ୍ଲୀ,୨୭।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଏ ସମ୍ପର୍କରେ ସୂଚନା ଦେଇ କେନ୍ଦ୍ର ମନ୍ତ୍ରୀ ଅନୁରାଗ ଠାକୁର କହିଛନ୍ତି, ଜମ୍ମୁ କଶ୍ମୀରରେ ହାଇଡ୍ରୋ ପ୍ରକଳ୍ପ ନିର୍ମାଣ ପ୍ରସ୍ତାବକୁ କ୍ୟାବିନେଟ ଅନୁମୋଦନ ଦେଇଛି। ଚେନାବ ନଦୀ ଉପରେ ୫୪୦ ମେଗାୱାଟ କାୱାର ହାଇଡ୍ରୋ ପ୍ରକଳ୍ପ ନିର୍ମାଣ ହେବ। ଏହି ପ୍ରକଳ୍ପ ପାଇଁ ୨୩,୦୦୦ କୋଟି ଟଙ୍କା ଖର୍ଚ୍ଚ ହେବ। ଏହି ପ୍ରକଳ୍ପର ନିର୍ମାଣ ସ୍ଥାନୀୟ ଲୋକଙ୍କୁ ରୋଜଗାର ମଧ୍ୟ ଯୋଗାଇବ। ଏହା ବ୍ୟତୀତ ଆଜିର ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।
ସେହିପରି ପିଏମ ଷ୍ଟ୍ରିଟ ଭେଣ୍ଡର ଆତ୍ମନିର୍ଭର ନିଧି(ପିଏମ୍ ସ୍ବନିଧି) ବର୍ତ୍ତମାନ ଡିସେମ୍ବର ୨୦୨୪ ପର୍ଯ୍ୟନ୍ତ ବୃଦ୍ଧି କରାଯିବ। ଏହା ଅଧୀନରେ ସରକାର ସାତ ପ୍ରତିଶତ ସବସିଡିରେ ରାସ୍ତାକଡ଼ ବିକ୍ରେତାଙ୍କୁ ରୁଣ ପ୍ରଦାନ କରୁଛନ୍ତି। ଭେଣ୍ଡିଂ ଜୋନ ଗୁଡିକ ୫୮୦୦ରୁ ୧୦,୫୦୦କୁ ବୃଦ୍ଧି କରାଯାଇଛି। ଅନ୍ୟାନ୍ୟ ନିଷ୍ପତ୍ତି ବିଷୟରେ କହିବାକୁ ଗଲେ, ଦଶଟି ରାଜ୍ୟରେ ୨୫୪୨ ଟାୱାରକୁ ୨ଜିରୁ ୪ଜି କରାଯିବ। ଏହି ଟାୱାର ଦେଶର ଦଶଟି ରାଜ୍ୟରେ ଅଛି। ଏଥି ପାଇଁ ୨୪୨୬ କୋଟି ଟଙ୍କା ଆବଣ୍ଟନ କରାଯାଇଛି।
ଏହା ବ୍ୟତୀତ ସାର ସବସିଡି ବୃଦ୍ଧି କରିବାକୁ ସରକାର ଅନୁମୋଦନ କରିଛନ୍ତି ଏବଂ ୬୧,୦୦୦ କୋଟି ଟଙ୍କା ଅତିରିକ୍ତ ସବସିଡି ମଧ୍ୟ ଦେବାକୁ ନିଷ୍ପତ୍ତି ନେଇଛନ୍ତି। ସେହିପରି ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କକୁ ୮୨୦ କୋଟି ଟଙ୍କା ଆର୍ଥିକ ସହାୟତା ଦେବାକୁ ନିଷ୍ପତ୍ତି ନିଆଯାଇଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।