ଭୁବନେଶ୍ୱର : ମହିଳା ଶକ୍ତି ଓ ସ୍ୱାଧୀନତା ଆନ୍ଦୋଳନର ଅଗ୍ରଣୀ ନେତ୍ରୀ ମାତୃଶକ୍ତି ମାତା ରମାଦେବୀଙ୍କ ୪୦ତମ ପୁଣ୍ୟତିଥି ପାଳନର ଅବ୍ୟବହିତ ପୂର୍ବରୁ ରମାଦେବୀ ମହିଳା ବିଶ୍ୱବିଦ୍ୟାଳୟରେ ସୋମବାର ବିଶ୍ୱବିଦ୍ୟାଳୟର ଏକାଡେମିକ୍ ବ୍ଲକ-୧ ରେ ଏକ ରକ୍ତଦାନ ଶିବିର ଆୟୋଜିତ ହୋଇଥିଲା। ଶିବିରଟି ବିଶ୍ୱବିଦ୍ୟାଳୟର ୟୁଥ୍ ରେଡ୍ କ୍ରସ୍ (ୱାଇଆରସି) ଏବଂ ରେଡ୍ କ୍ରସ୍ ଭୁବନେଶ୍ୱରର ମିଳିତ ଆନୁକୂଲ୍ୟରେ ଅନୁଷ୍ଠିତ ହୋଇଥିଲା।
ଉଦଘାଟନ ଉତ୍ସବରେ ଭାରପ୍ରାପ୍ତ କୁଳପତି ପ୍ରଫେସର ଚଣ୍ଡୀ ଚରଣ ରଥ, କୁଳସଚିବ ମନସ୍ବିନୀ ସାହୁ, କାଉନସିଲର ଡ଼. ରେବତୀକାନ୍ତ ମହାରଣା, ସାମ୍ବାଦିକତା ଓ ଗଣଯୋଗାଯୋଗ ବିଭାଗର ଅଧ୍ୟାପିକା ଶ୍ରୀମତୀ ନୀତି, ଗୃହ ବିଜ୍ଞାନ ବିଭାଗର ଅଧ୍ୟାପିକା ଶ୍ରୀମତୀ ହେଲେନା ଯତି ପ୍ରମୁଖ ଉପସ୍ଥିତ ଥିଲେ।
ଏହି ଅବସରରେ ପିଜି କାଉନସିଲ ଅଧ୍ୟକ୍ଷ ଚଣ୍ଡି ଚରଣ ରଥ ଶିବିରରେ ଉପସ୍ଥିତ ରହି ବଦଳୁଥିବା ସମାଜରେ ଯୁବତୀମାନଙ୍କ ଉଦ୍ୟମ ଓ ନିଶ୍ଛଳତା ପ୍ରତି ଶ୍ରଦ୍ଧା ବ୍ୟକ୍ତ କରିଥିଲେ।
ସେ କହିଥିଲେ, “ଏପରି ଉଦ୍ୟମ ସମାଜ ପାଇଁ ଏକ ଦିଗଦର୍ଶନ ଓ ପ୍ରେରଣା ସ୍ରୋତ ହେବ। ଏହା ଯୁବପୀଢ଼ିଙ୍କ ମଧ୍ୟରେ ସାମାଜିକ ଦାୟିତ୍ୱ ବୋଧ ବୃଦ୍ଧି କରିଥାଏ। ବିଶ୍ୱବିଦ୍ୟାଳୟରେ ଅନୁଷ୍ଠିତ ଏହି ମହତ କାର୍ଯ୍ୟକ୍ରମ ମାତୃଶକ୍ତି ପ୍ରତି ଗଭୀର ଶ୍ରଦ୍ଧା ଓ ସମ୍ମାନ ଅର୍ପଣ କରିଛି।
ବିଶ୍ୱବିଦ୍ୟାଳୟର କୁଳସଚିବ ମନସ୍ୱିନୀ ସାହୁ କହିଥିଲେ ଯେ, “ଏହି ପ୍ରୟାସ ତାଳମେଳ ଓ ସଂଘବଦ୍ଧ ଉଦ୍ୟମର ଫଳ। ଏହା ଦ୍ୱାରା ମାନବିକ ମୂଲ୍ୟ ବିକାଶ ପାଉଛି ଓ ଛାତ୍ରୀମାନେ ଏକ ଗଭୀର ଦାୟିତ୍ୱ ଅନୁଭବ କରୁଛନ୍ତି।
ବିଶ୍ୱବିଦ୍ୟାଳୟର ବିଭିନ୍ନ ବିଭାଗର ବହୁ ସଂଖ୍ୟକ ଛାତ୍ରୀ ସ୍ୱଇଚ୍ଛାରେ ଯୋଗଦେଇ ରକ୍ତଦାନ କରି ଏକ ସାମାଜିକ ଦାୟିତ୍ୱ ନିଭାଇଥିଲେ। ସମସ୍ତଙ୍କ ସହଯୋଗ ଓ ସମର୍ପଣ ଦ୍ୱାରା ଏହି ଶିବିର ଏକ ଅନୁପମ ଦୃଷ୍ଟାନ୍ତ ରୂପେ ଦେଖାଦେଲା।