ଓଡ଼ିଶା ପ୍ରଶାସନରେ ନୂଆ ଇତିହାସ: ପ୍ରଥମ ମହିଳା ମୁଖ୍ୟ ଶାସନ ସଚିବ ଭାବେ ଅନୁ ଗର୍ଗଙ୍କ ନିଯୁକ୍ତି

ଭୁବନେଶ୍ୱର: ଓଡ଼ିଶା ପ୍ରଶାସନିକ କ୍ଷେତ୍ରରେ ଏକ ନୂତନ ଅଧ୍ୟାୟ ସୃଷ୍ଟି ହୋଇଛି। ବରିଷ୍ଠ ଆଇଏଏସ (IAS) ଅଧିକାରୀ ଅନୁ ଗର୍ଗଙ୍କୁ ଓଡ଼ିଶାର ପରବର୍ତ୍ତୀ ମୁଖ୍ୟ ଶାସନ ସଚିବ ଭାବେ ନିଯୁକ୍ତ କରାଯାଇଛି। ରାଜ୍ୟର ଏହି ସର୍ବୋଚ୍ଚ ପ୍ରଶାସନିକ ପଦବୀ ଅଳଙ୍କୃତ କରିବାରେ ସେ ହେଉଛନ୍ତି ପ୍ରଥମ ମହିଳା। ବୁଧବାର ସନ୍ଧ୍ୟାରେ ରାଜ୍ୟ ସରକାରଙ୍କ ପକ୍ଷରୁ ଏନେଇ ଆଧିକାରିକ ବିଜ୍ଞପ୍ତି ପ୍ରକାଶ ପାଇଛି।

ମନୋଜ ଆହୁଜାଙ୍କ ସ୍ଥାନ ନେବେ ଅନୁ ଗର୍ଗ : ୧୯୯୧ ବ୍ୟାଚର ଏହି ଦକ୍ଷ ପ୍ରଶାସକ ବର୍ତ୍ତମାନର ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ସ୍ଥାନ ଗ୍ରହଣ କରିବେ। ଶ୍ରୀ ଆହୁଜା ଆସନ୍ତା ଡିସେମ୍ବର ୩୧ ତାରିଖରେ ଅବସର ଗ୍ରହଣ କରୁଛନ୍ତି। ଅନୁ ଗର୍ଗ ବର୍ତ୍ତମାନ ରାଜ୍ୟର ଉନ୍ନୟନ କମିଶନର ଭାବେ କାର୍ଯ୍ୟ କରୁଛନ୍ତି, ଯାହା ରାଜ୍ୟ ପ୍ରଶାସନର ଦ୍ୱିତୀୟ ସର୍ବୋଚ୍ଚ ପଦବୀ।

ପୂର୍ବରୁ ମଧ୍ୟ ରଚିଛନ୍ତି ଇତିହାସ: ଅନୁ ଗର୍ଗଙ୍କ କ୍ୟାରିୟର ସଫଳତାରେ ପରିପୂର୍ଣ୍ଣ। ୨୦୨୩ ଫେବୃଆରୀ ମାସରେ ସେ ଓଡ଼ିଶାର ପ୍ରଥମ ମହିଳା ଉନ୍ନୟନ କମିଶନର ଭାବେ ଦାୟିତ୍ୱ ଗ୍ରହଣ କରି ଚର୍ଚ୍ଚାକୁ ଆସିଥିଲେ। ୨୦୨୪ରେ ମୋହନ ଚରଣ ମାଝୀଙ୍କ ନେତୃତ୍ୱରେ ବିଜେପି ସରକାର ଗଠନ ହେବା ପରେ ମଧ୍ୟ ତାଙ୍କ ଦକ୍ଷତା ଉପରେ ସରକାର ପୂର୍ଣ୍ଣ ଭରସା ପ୍ରକଟ କରିଥିଲେ। ତାଙ୍କୁ ଯୋଜନା ଓ ସଂଯୋଜନ ବିଭାଗର ସଚିବ ଏବଂ ଜଳସମ୍ପଦ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଭାବେ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଥିଲା।

କେନ୍ଦ୍ର ଓ ରାଜ୍ୟରେ ବିପୁଳ ଅଭିଜ୍ଞତା : ଅନୁ ଗର୍ଗ କେବଳ ରାଜ୍ୟ ନୁହେଁ, କେନ୍ଦ୍ର ସରକାରଙ୍କ ଅଧୀନରେ ମଧ୍ୟ ଅନେକ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ସେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (PMO) ରେ ଯୁଗ୍ମ ସଚିବ ରହିବା ସହ ବୟନଶିଳ୍ପ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟରେ ପ୍ରମୁଖ ଭୂମିକା ନିଭାଇଛନ୍ତି। ରାଜ୍ୟର ଅନେକ ଫ୍ଲାଗସିପ୍ ଯୋଜନା ଯଥା- ‘ସୁଭଦ୍ରା ଯୋଜନା’, ଚାଷୀଙ୍କ ପାଇଁ ଇନପୁଟ୍ ସବସିଡି ଏବଂ ସ୍ୱାସ୍ଥ୍ୟ ବୀମା କାର୍ଡ ପ୍ରଚଳନରେ ତାଙ୍କର ପ୍ରମୁଖ ଅବଦାନ ରହିଛି। ଏପରିକି ୨୦୨୫ ରଥଯାତ୍ରା ସମୟରେ ଘଟିଥିବା ଦଳାଚକଟା ଘଟଣାର ତଦନ୍ତ ଦାୟିତ୍ୱ ମଧ୍ୟ ତାଙ୍କୁ ନ୍ୟସ୍ତ କରାଯାଇଥିଲା।

ଆଗାମୀ ଆହ୍ୱାନ : ମୁଖ୍ୟ ଶାସନ ସଚିବ ଭାବେ ଦାୟିତ୍ୱ ନେବା ପରେ ଅନୁ ଗର୍ଗଙ୍କ ପାଇଁ କେନ୍ଦ୍ର ଓ ରାଜ୍ୟ ମଧ୍ୟରେ ସମନ୍ୱୟ ରକ୍ଷା କରିବା, ଜିଲ୍ଲାସ୍ତରୀୟ ପ୍ରଶାସନକୁ ଅଧିକ କ୍ରିୟାଶୀଳ କରିବା ଏବଂ ସରକାରୀ ଯୋଜନାଗୁଡ଼ିକୁ ନିର୍ଦ୍ଧାରିତ ସମୟ ମଧ୍ୟରେ ହିତାଧିକାରୀଙ୍କ ପାଖରେ ପହଞ୍ଚାଇବା ବଡ଼ ଆହ୍ୱାନ ହେବ।

ଅନ୍ୟପଟେ, ଅବସର ନେବାକୁ ଯାଉଥିବା ମନୋଜ ଆହୁଜାଙ୍କୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ କୌଣସି ଏକ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତି ମିଳିପାରେ ବୋଲି ସୂତ୍ରରୁ ପ୍ରକାଶ।