ପୁରୀ : ଶ୍ରୀଜଗନ୍ନାଥ ମନ୍ଦିରରେ ଆଜି ବିଶେଷ ଧାର୍ମିକ ଅନୁଷ୍ଠାନ ‘ଅଣସର ଖଳିଲାଗି ଏକାଦଶୀ’ ପାଳିତ ହେଉଛି। ଏହି ନୀତି ମହାପ୍ରଭୁଙ୍କ ସମ୍ପୂର୍ଣ୍ଣ ସୁସ୍ଥତାର ପ୍ରତୀକ ଭାବେ ଦେଖାଯାଏ।
ସ୍ନାନ ପୂର୍ଣ୍ଣିମା ପରେ ଅଣସର ଘରେ ରହିଥିବା ଚତୁର୍ଦ୍ଧାମୂର୍ତ୍ତୀ ଦଶମୀ ତିଥିରେ ଶଯ୍ୟା ଛାଡିଛନ୍ତି। ଗତ ନଅ ଦିନ ଧରି ଜ୍ୱରରେ ପୀଡିତ ହୋଇ ବିଶ୍ରାମ ନେଉଥିବା ଠାକୁରମାନେ ଏବେ ଉଠି ବସିଛନ୍ତି। ଗତକାଲି ରାଜବୈଦ୍ୟଙ୍କ ତିଆରି କରିଥିବା ଦଶମୂଳ ମୋଦକ ଶ୍ରୀମନ୍ଦିରରେ ପହଞ୍ଚିଛି, ଯାହା ଏକାଦଶୀ ଦିନ ଠାକୁରଙ୍କୁ ଲାଗି କରାଯିବ।
ଏହି ଅବସରରେ ଦଇତା ଓ ପତିମହାପାତ୍ର ବିଶେଷ ପରମ୍ପରା ଅନୁଯାୟୀ ଠାକୁରଙ୍କ ଶ୍ରୀଅଙ୍ଗରେ ଚନ୍ଦନ ଲେପନ କରିବେ। ଏହି ଚନ୍ଦନ ମେଳାଣିରେ କର୍ପୂର, କେଶର ଓ କସ୍ତୁରୀ ମିଶାଯାଇଥାଏ। ତାପରେ ଠାକୁରମାନେ ବାରଲାଗି ପାଟ ପରିଧାନ କରି ତୁଳସୀ ଲାଗି ପରେ ଦଶମୂଳ ଲାଗି କରାଯିବ।
ଅଣସର ଅବଧିରେ ମହାପ୍ରଭୁଙ୍କ ଜ୍ୱର ଥିବାରୁ ଶ୍ରୀମନ୍ଦିର ଭିତରେ ଘଣ୍ଟ ବାଜିବା ବନ୍ଦ ଥାଏ। କିନ୍ତୁ ଖଳି ଲାଗି ବେଳେ ଘଣ୍ଟ ଓ କାହାଳୀ ବଜାଇ ଠାକୁରଙ୍କ ସୁସ୍ଥତା ଉତ୍ସବ ଭାବେ ପାଳିତ ହୁଏ। ଏହି ଧ୍ୱନି ଭକ୍ତମାନଙ୍କୁ ମହାପ୍ରଭୁଙ୍କ ଆରୋଗ୍ୟ ସୂଚନା ଦିଏ।
ଅଣସର ଖଳିଲାଗି ଏକାଦଶୀ ମାନେ କେବଳ ନୀତି ନୁହେଁ, ଏହା ଠାକୁରଙ୍କ ସହ ବିଶ୍ୱାସର ଅତୁଟ ବନ୍ଧନ, ଓ ଦେବଦେହରେ ମାନବତାର ଉତ୍ସବ ଅତୁଟ ରହିଛି।