ପୁରୀ: ପୂର୍ବ ଶତ୍ରୁତାର ପରିଣତି ଭୟଙ୍କର ହିଂସାରେ ଘଟିଛି। ବ୍ରହ୍ମଗିରି ଥାନା ଅନ୍ତର୍ଗତ ଛୋଟପୁର ଗାଁରେ ଏସିଡ୍ ଓ ବୋମାମାଡ଼ ହୋଇଥିବା ଜଣାପଡ଼ିଛି। ଏହି ଆକ୍ରମଣରେ ଦୁଇ ଜଣ ଗୁରୁତର ଭାବେ ଆହତ ହୋଇଛନ୍ତି।
ଆହତ ହୋଇଥିବା ବ୍ରଜବନ୍ଧୁ ମହାପାତ୍ର ଓ ଆଲୋକ ମହାପାତ୍ରଙ୍କୁ ପୁରୀ ସଦର ଚିକିତ୍ସାଳୟରେ ଭର୍ତ୍ତି କରାଯାଇଛି। ବ୍ରଜବନ୍ଧୁ ଗାଁରେ ଏକ ରାସନ ଦୋକାନ ଚଲାଉଥିଲେ । ଶୁକ୍ରବାର ଅପରାହ୍ନ ସମୟରେ ଦୋକାନରେ ବସିଥିବା ବେଳେ ଅଭିଯୁକ୍ତ ଶୁକଦେବ ମିଶ୍ର ଏସିଡ୍ ଭର୍ତ୍ତି ଥଣ୍ଡା ପାନୀୟ ବୋତଲ ଓ ବୋମା ସହ ଆସି ଆକ୍ରମଣ କରିଥିଲେ।
ସୂଚନା ଅନୁଯାୟୀ, ବ୍ରହ୍ମଗିରି ଥାନା ଅନ୍ତର୍ଗତ ଛୋଟପୁର ଗାଁରେ ଦୋକାନୀ ବ୍ରଜବନ୍ଧୁ ମହାପାତ୍ର ନିଜ ଦୋକାନରେ ବସିଥିଲେ। ଦୋକାନକୁ ଜିନିଷପତ୍ର କିଣିବା ପାଇଁ ଆଲୋକ ମହାପାତ୍ର ଯାଇଥିଲେ। ଏହି ସମୟରେ ଶୁକଦେବ ମିଶ୍ର ଦୋକାନରେ ପହଞ୍ଚି ଥିଲା। ଦୋକାନ ମାଲିକ ବ୍ରଜବନ୍ଧୁଙ୍କ ସହିତ ସେ ଯୁକ୍ତିତର୍କ କରିଥିଲା। ଉତ୍ତେଜନା ବଢ଼ିବାରେ ଲାଗିଅବାରୁ ସେ ସାଥୀରେ ଆଣିଥିବା ଏସିଡରେ ପ୍ରଥମେ ଆକ୍ରମଣ କରିଥିଲା ଏବଂ ଏହାପରେ ବୋମାମାଡ଼ କରିଥିଲା। ଏହି ଆକ୍ରମଣରେ ବ୍ରଜବନ୍ଧୁଙ୍କ ସମେତ ଆଲୋକ ମଧ୍ୟ ଆହତ ହୋଇଥିଲେ। ଉଭୟ ଦୋକାନୀ ଓ ଗ୍ରାହକ ଆକ୍ରମଣ ଶିକାର ହୋଇ ଛଟପଟ ହେଉଥିବା ବେଳେ ଅଭିଯୁକ୍ତ ଶୁକଦେବ ଘଟଣାସ୍ଥଳରୁ ଫେରାର ହୋଇଯାଇଥିଲା।
ଦୁଇ ଜଣଙ୍କ ମଧ୍ୟରେ ଗୁରୁବାର ଓ ଶୁକ୍ରବାର ସକାଳେ ଯୁକ୍ତିତର୍କ ଓ ପାଟିତୁଣ୍ଡ ଘଟିଥିଲା। ଏହାର ପରିଣାମ ସେଠାରେ ଏସିଡ୍ ଓ ବୋମାମାଡ଼ ହୋଇଥିବା ଜଣାପଡ଼ିଛି। ଦୋକାନକୁ ସଉଦା ପାଇଁ ଆସିଥିବା ଆଲୋକ ମଧ୍ୟ ଆକ୍ରମଣରେ ଆହତ ହୋଇଛନ୍ତି।
ଘଟଣା ସ୍ଥଳକୁ ବ୍ରହ୍ମଗିରି ପୋଲିସ ସାଇଣ୍ଟିଫିକ୍ ଟିମ୍ ସହ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣାସ୍ଥଳରୁ ଏସିଡ୍ ଓ ଫୁଟିଥିବା ବୋମାର ଅଂଶ ଜବତ କରାଯାଇଛି। ଅଭିଯୁକ୍ତ ଶୁକଦେବ ମିଶ୍ର ଏବେ ବି ଫେରାର ଅଛନ୍ତି ଓ ପୋଲିସ ତାଙ୍କୁ ଧରିବା ପାଇଁ ଚଢ଼ାଉ ଜାରି ରଖିଛି।
ରିପୋର୍ଟ: ଶୁଭସ୍ମିତା ପ୍ରଧାନ