ବାଂଲାଦେଶରେ ନିର୍ବାଚନ ପୂର୍ବରୁ ପୁଣି ରକ୍ତପାତ: ହିନ୍ଦୁ ଯୁବକଙ୍କୁ ନିର୍ମମ ହତ୍ୟା

ଭୁବନେଶ୍ୱର: ବାଂଲାଦେଶରେ ସାଧାରଣ ନିର୍ବାଚନ ପାଇଁ ପ୍ରସ୍ତୁତି ଚାଲିଥିବା ବେଳେ ସଂଖ୍ୟାଲଘୁ ହିନ୍ଦୁ ସମ୍ପ୍ରଦାୟ ଉପରେ ଆକ୍ରମଣ ଥମିବାର ନାମ ନେଉନାହିଁ। ଭୋଟ୍ ପୂର୍ବରୁ ଦେଶର ବିଭିନ୍ନ ସ୍ଥାନରେ ହିଂସାତ୍ମକ ପରିସ୍ଥିତି ସୃଷ୍ଟି ହେଉଥିବା ବେଳେ ଏବେ ମୌଲଭି ବଜାର ଅଞ୍ଚଳରେ ଜଣେ ହିନ୍ଦୁ ଯୁବକଙ୍କୁ ଅତି ବର୍ବର ଭାବେ ହତ୍ୟା କରାଯାଇଥିବା ଖବର ସାମ୍ନାକୁ ଆସିଛି। ମୃତ ଯୁବକଙ୍କ ନାମ ରତନ ସାହୁକାର ବୋଲି ଜଣାପଡ଼ିଛି। ରତନ ଜଣେ ଗରିବ ଶ୍ରମିକ ଭାବେ ସ୍ଥାନୀୟ ଚା’ ବଗିଚାରେ କାମ କରି ନିଜ ପରିବାର ପ୍ରତିପୋଷଣ କରୁଥିଲେ।

ମିଳିଥିବା ସୂଚନା ଅନୁଯାୟୀ, ରତନଙ୍କ ମୃତଦେହ ଚମ୍ପାରା ଅଞ୍ଚଳର ଏକ ଚା’ ବଗିଚା ମଧ୍ୟରୁ ଅତି ଅମାନୁଷିକ ଅବସ୍ଥାରେ ଉଦ୍ଧାର କରାଯାଇଛି। ତାଙ୍କର ହାତ ଏବଂ ଗୋଡ଼ ବନ୍ଧା ହୋଇଥିବା ବେଳେ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ଚିହ୍ନ ରହିଛି। ପ୍ରାଥମିକ ଦୃଷ୍ଟିରୁ ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି। ଦୁର୍ବୃତ୍ତମାନେ ପ୍ରଥମେ ତାଙ୍କର ହାତଗୋଡ଼ ବାନ୍ଧି ଅକର୍ମଣ୍ୟ କରିଦେଇଥିଲେ ଏବଂ ପରେ କୌଣସି ଧାରୁଆ ଅସ୍ତ୍ର ସାହାଯ୍ୟରେ ତାଙ୍କୁ ହତ୍ୟା କରିଥିବା ଆଶଙ୍କା କରାଯାଉଛି। ଘଟଣାସ୍ଥଳରେ ବାଂଲାଦେଶ ପୋଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଛି।

ବାଂଲାଦେଶରେ ସାମ୍ପ୍ରତିକ ସ୍ଥିତିରେ ହିନ୍ଦୁମାନଙ୍କ ସୁରକ୍ଷାକୁ ନେଇ ଗମ୍ଭୀର ପ୍ରଶ୍ନବାଚୀ ସୃଷ୍ଟି ହୋଇଛି। ଗତ ଡିସେମ୍ବର ମାସରୁ ବର୍ତ୍ତମାନ ସୁଦ୍ଧା ମାତ୍ର କିଛି ମାସ ମଧ୍ୟରେ ପ୍ରାୟ ୧୭ ଜଣ ହିନ୍ଦୁଙ୍କୁ ବିଭିନ୍ନ ଅଞ୍ଚଳରେ ହତ୍ୟା କରାଯାଇଥିବା ସରକାରୀ ଓ ବେସରକାରୀ ସୂତ୍ରରୁ ଜଣାପଡ଼ିଛି। ନିର୍ବାଚନ ସମୟରେ ରାଜନୈତିକ ଏବଂ ସାମ୍ପ୍ରଦାୟିକ ଉତ୍ତେଜନାକୁ ବ୍ୟବହାର କରି ସଂଖ୍ୟାଲଘୁଙ୍କୁ ଟାର୍ଗେଟ୍ କରାଯାଉଥିବା ଅଭିଯୋଗ ହେଉଛି। ହିନ୍ଦୁ ଘର, ବ୍ୟବସାୟିକ ପ୍ରତିଷ୍ଠାନ ଏବଂ ମନ୍ଦିର ଉପରେ ହେଉଥିବା ବାରମ୍ବାର ଆକ୍ରମଣ ଘଟଣା ବାଂଲାଦେଶର ହିନ୍ଦୁ ସମାଜ ମଧ୍ୟରେ ଭୟ ଓ ଆତଙ୍କର ବାତାବରଣ ସୃଷ୍ଟି କରିଛି।

ଏହି ନୃଶଂସ ହତ୍ୟାକାଣ୍ଡ ପରେ ସ୍ଥାନୀୟ ହିନ୍ଦୁ ସଙ୍ଗଠନଗୁଡ଼ିକ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ରତନ ସାହୁକାରଙ୍କ ହତ୍ୟାକାରୀଙ୍କୁ ତୁରନ୍ତ ଗିରଫ କରି କଠୋର ଦଣ୍ଡ ଦେବା ପାଇଁ ଦାବି ଜୋର ଧରିଛି। ମାନବଧିକାର କର୍ମୀମାନେ ବାଂଲାଦେଶ ସରକାରଙ୍କୁ ସଂଖ୍ୟାଲଘୁଙ୍କ ଜୀବନ ଓ ସମ୍ପତ୍ତିର ସୁରକ୍ଷା ନିଶ୍ଚିତ କରିବାକୁ ଅନୁରୋଧ କରିଛନ୍ତି। ଆଗକୁ ନିର୍ବାଚନ ଥିବାରୁ ଏଭଳି ଘଟଣା ସମ୍ପର୍କୀୟ ତଥ୍ୟ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲଟିଥିବା ବେଳେ ବାଂଲାଦେଶ ପ୍ରଶାସନ ପାଇଁ ଆଇନ ଶୃଙ୍ଖଳା ରକ୍ଷା କରିବା ଏକ ବଡ଼ ଆହ୍ୱାନ ଭାବେ ଛିଡ଼ା ହୋଇଛି।