ନୟାଗଡ଼: ଦଶପଲ୍ଲା-ଭଞ୍ଜନଗର ରାଜ୍ୟ ରାଜପଥରେ ଅଭାବନୀୟ ଘଟଣା ଘଟିଛି। ଏକ ସ୍କର୍ପିଓ ଗାଡିରେ ଆସିଥିବା ୮ ଜଣ ଦୁର୍ବୃତ୍ତ ପଥଚାରୀଙ୍କୁ ଆକ୍ରମଣ ସହ ଏକ ବାଇକରେ ନିଅଁ ଲଗାଇ ଜଳାଇ ଦେଇଥିଲେ। ସେମାଙ୍କ ଆକ୍ରମଣରେ ବାଇକ୍ ଚାଳକ ଗୁରୁତର ଆହତ ହୋଇଥିବା ସୂଚନା ମିଳିଛି। ଆହତ ବାଇକ ଆରୋହୀ ଜଣକ ହେଉଛନ୍ତି ଖଣ୍ଡପଡ଼ା ଗ୍ରାମର ଜଟିଆ ବେହେରା ବୋଲି ଜଣ ପଡିଛି ।
ଦଶପଲ୍ଲା- ଭଞ୍ଜନଗର ରାସ୍ତାର ଦଶପଲ୍ଲା ଥାନା ସାକେଣୀ ନିକଟରେ ଆତଙ୍କ ଦୁର୍ବୃତ୍ତ ରଚିଛନ୍ତି। ଏକ ବାଇକରେ ଯାଉଥିବା ଜାତିଆଙ୍କ ସହ ତାଙ୍କ ଦୁଇଜଣ ସାଙ୍ଗ ବ୍ୟବସାୟୀଙ୍କୁ ପ୍ରାୟ ୮ଜଣ ଦୁର୍ବୃତ୍ତ ବୋଲେରୋରେ ଆସି ଅଟକାଇବା ସହ ମରଣାନ୍ତକ ଆକ୍ରମଣ କରିଛନ୍ତି। ଘଟଣା ସ୍ଥଳରୁ ଦୁଇ ବ୍ୟବସାୟୀ ଖସି ଯାଇଥିବା ବେଳେ ଜଟିଆଙ୍କୁ ଅତି ଅମାନବୀୟ ଭାବରେ ଦୁର୍ବୃତ୍ତମାନେ ଆକ୍ରମଣ କରିଥିଲେ। ଧାରୁଆ ଅସ୍ତ୍ରରେ ଆକ୍ରମଣ କରିବା ସହ ବାଇକକୁ ଜାଳି ଦେଇଛନ୍ତି। ଏପରିକି ଜଟିଆଙ୍କ ଠାରୁ ମୋବାଇଲ ଓ ନଗଦ ୭୨୦୦ ଟଙ୍କା ଲୁଟି ନେଇଥିଲେ।
ଦଶପଲ୍ଲା ଥାନା ଅଧୀନ ଥିବା ସାକେଣୀ ଗ୍ରାମ ନିକଟରେ ଏହି ଘଟଣା ଘଟିଛି। ସେ ତାଙ୍କର ଦୁଇ ଜଣ ସାଙ୍ଗ ସହ ଏକ କାମ ପାଇଁ ଭଞ୍ଜନଗର ଯାଉଥିବା ବେଳେ ଭୋର୍ ୪ଟା ସମୟରେ ଦୁର୍ବୃତ୍ତମାନେ ଜଟିଆଙ୍କ ବାଇକ୍ ଅଟକାଇ ତାଙ୍କ ପାଖରେ ଥିବା ଟଙ୍କା ଦେବାକୁ କହିଥିଲେ। ସେମାନଙ୍କ କଥାରେ ଜଟିଆ ରାଜି ନ ହେବାରୁ ହଠାତ୍ ସେମାନେ ତାଙ୍କୁ ଆକ୍ରମଣ କରିଥିଲେ। ଜଟିଆଙ୍କୁ ମାଡ଼ ମାରି ବ୍ଲେଡ୍ ଦ୍ୱାରା ଆକ୍ରମଣ କରିଥିଲେ। ତାଙ୍କ ସହିତ ଥିବା ଅନ୍ୟ ଦୁଇ ଜଣ ଭୟରେ ଘଟଣାସ୍ଥଳରୁ ପଳାଇଯାଇଥିଲେ। ଆକ୍ରମଣ ପରେ ଦୁର୍ବୃତ୍ତମାନେ ବାଇକକୁ ପୋଡ଼ି ଦେଇଥିଲେ।
ଘଟଣା ପରେ ସ୍ଥାନୀୟ ଲୋକେ ଗୁରୁତର ଆହତ ଜଟିଆଙ୍କୁ ଉଦ୍ଧାର ପରେ ଦଶପଲ୍ଲା ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ଏହି ଘଟଣା ସମ୍ପର୍କରେ ଦଶପଲ୍ଲା ଥାନାରେ ଅଭିଯୋଗ ହୋଇଛି ଏବଂ ପୋଲିସ ଘଟଣାସ୍ଥଳ ପରିଦର୍ଶନ ସହ ତଦନ୍ତ ଆରମ୍ଭ କରିଛି।
ରିପୋର୍ଟ: ଶୁଭସ୍ମିତା ପ୍ରଧାନ