ଡେରାଡୁନ, ୨୬।୫: ଏଲୋପାଥି ଔଷଧ ଓ ଏଲୋପାଥି ଡାକ୍ତରଙ୍କ ଉପରେ ଅପମାନଜନକ ମନ୍ତବ୍ୟ ପୁଣି ଥରେ ବାବା ରାମଦେବଙ୍କ ପାଇଁ ସୃଷ୍ଟି କରିଛି ଅଢ଼ୁଆ। ଏହି ମନ୍ତବ୍ୟ କାରଣରୁ ତାଙ୍କ ବିରୋଧରେ ମାନହାନୀ ନୋଟିସ ଜାରି କରିଛି ଭାରତୀୟ ମେଡିକାଲ ଆସୋସିଏଶନ (ଆଇଏମ୍ଏ)। ୧୫ ଦିନ ମଧ୍ୟରେ ରାମଦେବଙ୍କଠାରୁ କ୍ଷମାପ୍ରାର୍ଥନା ପାଇଁ ଆସୋସିଏଶନ ପକ୍ଷରୁ ଦାବି କରାଯାଇଛି। ନହେଲେ ଯୋଗ ଗୁରୁଙ୍କୁ ୧ ହଜାର କୋଟି ଟଙ୍କାର କ୍ଷତିପୂରଣ ଦେବାକୁ ପଡ଼ିବ ବୋଲି ନୋଟିସ ଉଲ୍ଲେଖ ରହିଛି।
୬ ପୃଷ୍ଠା ବିଶିଷ୍ଟ ନୋଟିସ ଆଇଏମ୍ଏ (ଉତ୍ତରାଖଣ୍ଡ) ସମ୍ପାଦକ ଅଜୟ ଖାନ୍ନାଙ୍କ ପକ୍ଷରୁ ଜାରି କରାଯାଇଛି। ତାଙ୍କ ଓକିଲ ନିରଜ ପାଣ୍ଡେ କହିଛନ୍ତି, ରାମଦେବଙ୍କ ମନ୍ତବ୍ୟ ଦ୍ୱାରା ଏଲୋପାଥି ଓ ଆସୋସିଏଶନ ସହ ଜଡ଼ିତ ୨ ହଜାର ଡାକ୍ତରଙ୍କ ସମ୍ମାନହାନୀ ହୋଇଛି। ଭାରତୀୟ ପିଙ୍ଗଳ କୋଡ୍ ୪୯୯ ଧାରା ଅନୁଯାୟୀ, ଯୋଗଗୁରୁଙ୍କ ମନ୍ତବ୍ୟ ଏକ ଆପରାଧିକ କାର୍ଯ୍ୟ। ନୋଟିସରେ ୧୫ ଦିନ ମଧ୍ୟରେ ଲିଖିତ କ୍ଷମାପ୍ରାର୍ଥନା କରିବାକୁ କୁହାଯାଇଛି। ଯଦି ସେ ଏଭଳି ନ କରନ୍ତି, ତେବେ ତାଙ୍କୁ ଆସୋସିଏଶନର ପ୍ରତ୍ୟେକ ସଦସ୍ୟ ପିଛା କ୍ଷତିପୂରଣ ବାବଦକୁ ୫୦ ଲକ୍ଷ ଟଙ୍କା ଦେବାକୁ ପଡ଼ିବ।
ନୋଟିସରେ ଯୋଗ ଗୁରୁଙ୍କୁ ସମସ୍ତ ପ୍ଲାଟଫର୍ମରୁ ‘କୋରୋନିଲ କିଟ୍’ ସମ୍ପର୍କୀତ ବିଜ୍ଞାପନକୁ ହଟାଇବାକୁ କୁହାଯାଇଛି। ନଚେତ ତାଙ୍କ ବିରୋଧରେ ମାମଲା ଦାୟର କରାଯିବ।