ଗୁଣାତ୍ମକ ସ୍ୱାସ୍ଥ୍ୟସେବା ମାଧ୍ୟମରେ ଦେଶସେବା ପାଇଁ ଏମ୍ସ ଭୁବନେଶ୍ୱର ପ୍ରତିଶ୍ରୁତିବଦ୍

• ଜାତୀୟ ପତାକା ଉତ୍ତୋଳନ କଲେ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ଵାସ

• ଖୁବ୍ ଶୀଘ୍ର ପ୍ରଚଳନ ହେବ ଏକାଧିକ ଲୋକାଭିମୁଖୀ ନୂତନ ସ୍ୱାସ୍ଥ୍ୟସେବା ବ୍ୟବସ୍ଥା

ଭୁବନେଶ୍ୱର: ଦେଶପ୍ରେମର ଅନନ୍ୟ ପରିବେଶ ଏବଂ ବିପୁଳ ଉତ୍ସାହ ମଧ୍ୟରେ ଏମ୍ସ (AIIMS) ଭୁବନେଶ୍ୱରରେ ୭୭ତମ ଗଣତନ୍ତ୍ର ଦିବସ ପାଳିତ ହୋଇଯାଇଛି। ପ୍ରତିଷ୍ଠାନର ଅଧ୍ୟାପକ, ଅଧ୍ୟାପିକା, ଛାତ୍ରଛାତ୍ରୀ ଏବଂ ସମସ୍ତ କର୍ମଚାରୀଙ୍କ ଉପସ୍ଥିତିରେ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ଆଶୁତୋଷ ବିଶ୍ୱାସ ଜାତୀୟ ପତାକା ଉତ୍ତୋଳନ କରିଥିଲେ।

ଏହି ଅବସରରେ ସମାବେଶକୁ ସମ୍ବୋଧିତ କରି ଡ. ବିଶ୍ୱାସ କହିଥିଲେ ଯେ, ଅଭିନବ, ସୁଗମ ଏବଂ ଗୁଣାତ୍ମକ ସ୍ୱାସ୍ଥ୍ୟସେବା ମାଧ୍ୟମରେ ଦେଶସେବା କରିବା ପାଇଁ ଏମ୍ସ ଭୁବନେଶ୍ୱର ସଦା ପ୍ରତିଶ୍ରୁତିବଦ୍ଧ। ଅତ୍ୟାଧୁନିକ ଗବେଷଣା, ଉନ୍ନତ କ୍ଲିନିକାଲ୍ ସେବା ଏବଂ ଜନକଲ୍ୟାଣକାରୀ ପଦକ୍ଷେପ ଯୋଗୁଁ ଏହା ଆଜି ଦେଶର ଅନ୍ୟତମ ବିଶ୍ୱସ୍ତ ସ୍ୱାସ୍ଥ୍ୟସେବା ପ୍ରତିଷ୍ଠାନ ଭାବେ ଉଭା ହୋଇଛି। ଆଗାମୀ ଦିନରେ ଏଠାରେ ଆହୁରି ଅନେକ ପ୍ରଭାବଶାଳୀ ଓ ଲୋକାଭିମୁଖୀ ସ୍ୱାସ୍ଥ୍ୟସେବା ଆରମ୍ଭ କରାଯିବ ବୋଲି ସେ ନିଜ ଅଭିଭାଷଣରେ ପ୍ରକାଶ କରିଥିଲେ।

ଏହି ଗୌରବମୟ ଉତ୍ସବରେ ଡିନ୍ ଡ. ପି. ଆର୍. ମହାପାତ୍ର, ଡ. ସତ୍ୟଜିତ ମିଶ୍ର ଏବଂ ଡ. ସୌଭାଗ୍ୟ କୁମାର ଜେନା ପ୍ରମୁଖ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ଏଥିସହିତ ପ୍ରତିଷ୍ଠାନର ଛାତ୍ରଛାତ୍ରୀ ଓ ନର୍ସିଂ ଅଧିକାରୀମାନଙ୍କ ଦ୍ୱାରା ଚିତ୍ତାକର୍ଷକ ଦେଶାତ୍ମବୋଧକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ଶେଷରେ ଡିଡିଏ ଲେଫ୍ଟନାଣ୍ଟ କର୍ଣ୍ଣେଲ ଅଭିଜିତ ସରକାର ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।