ଜେଇଇ (ମେନ୍) ୨୦୨୬: ଡିଏଭି ଚନ୍ଦ୍ରଶେଖରପୁରର ଚମକ, ୨୧ ଜଣ ପରୀକ୍ଷାର୍ଥୀଙ୍କୁ ୯୯ରୁ ଊର୍ଦ୍ଧ୍ୱ ପର୍ସେଣ୍ଟାଇଲ୍
ଭୁବନେଶ୍ୱର: ଜେଇଇ (ମେନ୍) ୨୦୨୬ ସେସନ୍-୧ ପରୀକ୍ଷା ଫଳ ପ୍ରକାଶ ପାଇବା ପରେ ଓଡ଼ିଶାର ଶିକ୍ଷା କ୍ଷେତ୍ରରେ ପୁଣି ଥରେ ଉତ୍ସାହର ଲହରୀ ଖେଳିଯାଇଛି। ବିଶେଷ କରି ଭୁବନେଶ୍ୱରସ୍ଥିତ ଡିଏଭି ପବ୍ଲିକ ସ୍କୁଲ, ଚନ୍ଦ୍ରଶେଖରପୁରର ବିଦ୍ୟାର୍ଥୀମାନେ ଚଳିତ ବର୍ଷ ଅତ୍ୟନ୍ତ ପ୍ରଶଂସନୀୟ ସାଫଲ୍ୟ ହାସଲ କରି ସମଗ୍ର ରାଜ୍ୟ ପାଇଁ ଗୌରବ ଆଣିଛନ୍ତି। ଜାତୀୟ ପରୀକ୍ଷା ସଂସ୍ଥା (ଏନ୍ଟିଏ) ଦ୍ୱାରା ପରିଚାଳିତ ଏହି ସମ୍ମାନଜନକ ପରୀକ୍ଷାରେ ବିଦ୍ୟାଳୟର ସର୍ବାଧିକ ୨୧ ଜଣ ବିଦ୍ୟାର୍ଥୀ ୯୯ରୁ ଊର୍ଦ୍ଧ୍ୱ ପର୍ସେଣ୍ଟାଇଲ୍ ରଖି କୃତକାର୍ଯ୍ୟ ହୋଇଛନ୍ତି, ଯାହା ଶିକ୍ଷାନୁଷ୍ଠାନର ଶୈକ୍ଷିକ ମାନଦଣ୍ଡକୁ ପୁନଃ ପ୍ରତିପାଦିତ କରିଛି।
ଏହି ସଫଳତାର ଶୀର୍ଷରେ ରହିଛନ୍ତି ଶାକ୍ୟସିଂହ ପାତ୍ର, ଯିଏ କି ୯୯.୯୮୯ ପର୍ସେଣ୍ଟାଇଲ୍ ହାସଲ କରି ବିଦ୍ୟାଳୟର ଟପ୍ପର ହେବାର ସୌଭାଗ୍ୟ ଅର୍ଜନ କରିଛନ୍ତି। ତାଙ୍କ ପଛକୁ ସ୍ଥିତପ୍ରଜ୍ଞ କର ୯୯.୯୩୨ ପର୍ସେଣ୍ଟାଇଲ୍ ସହ ଦ୍ୱିତୀୟ ସ୍ଥାନ ଏବଂ ସାଇ ପ୍ରସାଦ ମିଶ୍ର ୯୯.୯୨୮ ପର୍ସେଣ୍ଟାଇଲ୍ ସହ ତୃତୀୟ ସ୍ଥାନରେ ରହିଛନ୍ତି। ଏହି କୃତୀ ଛାତ୍ରମାନଙ୍କର କଠିନ ପରିଶ୍ରମ ଓ ନିଷ୍ଠା ସେମାନଙ୍କୁ ଏହି ଉଚ୍ଚ ସୋପାନରେ ପହଞ୍ଚାଇବାରେ ସଫଳ ହୋଇଛି। ଅନ୍ୟ ପ୍ରମୁଖ ସଫଳତା ପାଇଥିବା ବିଦ୍ୟାର୍ଥୀମାନଙ୍କ ମଧ୍ୟରେ ଅର୍ଜୁନ ମହାନ୍ତି (୯୯.୮୩୮), ଆଶୁତୋଷ ଆଚାର୍ଯ୍ୟ (୯୯.୭୩୧), ବୈଭବ ଦାସ (୯୯.୬୮୫), ଦେବୀଦତ୍ତ ପଣ୍ଡା (୯୯.୫୯୦), ପ୍ରିୟାଂଶୁ ସେନାପତି (୯୯.୫୨୧) ଓ ମେୟନ୍ ରାଉତ (୯୯.୪୮୧) ପ୍ରମୁଖ ରହିଛନ୍ତି। ସେହିପରି ପର୍ଣ୍ଣସ ରାୟ (୯୯.୪୫୮), ଅର୍ପିତ ବେହେରା (୯୯.୪୫୨), ଦେବାଂଶ ନାୟକ (୯୯.୪୩୩), ଅଭିଳାଷା ପଣ୍ଡା (୯୯.୪୨୭), ଐନେଶ ଦାଶ (୯୯.୩୯୩), ପ୍ରୀତ୍ ଆଚାର୍ଯ୍ୟ (୯୯.୩୯୩), ଆୟୁଷ ଗୁପ୍ତା (୯୯.୨୧୯), ପିୟୁଷ ସିଂଘାଣିଆ (୯୯.୧୩୮), ଶୁଭି ଅଗ୍ରୱାଲା (୯୯.୧୩୪), ସୁଦୀପ୍ତ ପୁଥାଲ୍ (୯୯.୦୮୮), ଆଶୀର୍ବାଦ ନାୟକ (୯୯.୦୭୧) ଓ ବିଶ୍ୱଜିତା ରାଉତ (୯୯.୦୨୮) ମଧ୍ୟ ୯୯ ପର୍ସେଣ୍ଟାଇଲ୍ରୁ ଅଧିକ ନମ୍ବର ରଖି ନିଜର ପ୍ରତିଭା ପ୍ରଦର୍ଶନ କରିଛନ୍ତି।
ସଫଳତାର ଏହି ଧାରା କେବଳ ଶୀର୍ଷସ୍ଥାନୀୟ ୨୧ ଜଣଙ୍କ ମଧ୍ୟରେ ସୀମିତ ନାହିଁ। ବିଦ୍ୟାଳୟର ମୋଟ ୩୯ ଜଣ ବିଦ୍ୟାର୍ଥୀ ୯୮ରୁ ଊର୍ଦ୍ଧ୍ୱ ପର୍ସେଣ୍ଟାଇଲ୍, ୪୮ ଜଣ ୯୭ରୁ ଊର୍ଦ୍ଧ୍ୱ, ୭୩ ଜଣ ୯୫ରୁ ଊର୍ଦ୍ଧ୍ୱ ଏବଂ ୧୨୨ ଜଣ ବିଦ୍ୟାର୍ଥୀ ୯୦ରୁ ଅଧିକ ପର୍ସେଣ୍ଟାଇଲ୍ ରଖି ମେଧା ତାଲିକାରେ ସ୍ଥାନ ପାଇବା ସ୍କୁଲ ପାଇଁ ଏକ ବଡ଼ ଉପଲବ୍ଧି। ଛାତ୍ରଛାତ୍ରୀଙ୍କ ଏହି ଉଲ୍ଲେଖନୀୟ ପ୍ରଦର୍ଶନ ସୂଚାଉଛି ଯେ ସେମାନେ ନିୟମିତ ଅଧ୍ୟୟନ ଓ ଶିକ୍ଷକମାନଙ୍କ ସଠିକ୍ ମାର୍ଗଦର୍ଶନକୁ ସଫଳତାର ଚାବିକାଠି ଭାବେ ଗ୍ରହଣ କରିଛନ୍ତି।
ଡିଏଭି ଚନ୍ଦ୍ରଶେଖରପୁରର ଏହି ରେକର୍ଡ ସାଫଲ୍ୟ ପାଇଁ ବିଦ୍ୟାଳୟ କର୍ତ୍ତୃପକ୍ଷ ଉଚ୍ଚ ପ୍ରଶଂସା କରିଛନ୍ତି। ବିଦ୍ୟାଳୟ ପରିଚାଳନା ସମିତି ଏବଂ ଅଧ୍ୟକ୍ଷ ସଂପୃକ୍ତ ସମସ୍ତ କୃତୀ ଛାତ୍ରଛାତ୍ରୀଙ୍କ ସମେତ ସେମାନଙ୍କ ଅଭିଭାବକ ଏବଂ ଶିକ୍ଷକଶିକ୍ଷୟିତ୍ରୀମାନଙ୍କୁ ଆନ୍ତରିକ ଅଭିନନ୍ଦନ ଜଣାଇଛନ୍ତି। ସ୍କୁଲ ପକ୍ଷରୁ କୁହାଯାଇଛି ଯେ ଶିକ୍ଷକମାନଙ୍କର ନିରନ୍ତର ପ୍ରଚେଷ୍ଟା ଓ ଛାତ୍ରଛାତ୍ରୀଙ୍କ ଏକାଗ୍ରତା ହିଁ ଏହି ସଫଳତାକୁ ସମ୍ଭବ କରିଛି। ଏଥିସହ ଆଗାମୀ ଜେଇଇ (ଆଡଭାନ୍ସଡ୍) ଏବଂ ଦ୍ୱିତୀୟ ସେସନ୍ ପରୀକ୍ଷା ପାଇଁ ବିଦ୍ୟାଳୟ ପକ୍ଷରୁ ସମସ୍ତ ପରୀକ୍ଷାର୍ଥୀଙ୍କୁ ଶୁଭେଚ୍ଛା ଜ୍ଞାପନ କରାଯାଇଛି। ଏହି ସଫଳତା ଅନ୍ୟ କନିଷ୍ଠ ବିଦ୍ୟାର୍ଥୀମାନଙ୍କ ପାଇଁ ପ୍ରେରଣାର ଉତ୍ସ ହେବ ବୋଲି ଆଶା କରାଯାଉଛି। ଭବିଷ୍ୟତରେ ଏହି ମେଧାବୀ ଛାତ୍ରଛାତ୍ରୀମାନେ ଦେଶର ପ୍ରତିଷ୍ଠିତ ବୈଷୟିକ ଶିକ୍ଷାନୁଷ୍ଠାନଗୁଡ଼ିକରେ ସ୍ଥାନ ପାଇବେ ବୋଲି ସମସ୍ତେ ଆଶାବାଦୀ ଅଛନ୍ତି।